सुरतः मानहानीच्या खटल्या प्रकरणी काँग्रेस नेते आज सुरतमधील कोर्टात हजर झाले. या प्रकरणी आता १० डिसेंबरला पुढील सुनावणी होणार आहे. तर उद्या आणखी एका प्रकरणात राहुल गांधी अहमदाबादमधील कोर्टात हजर होणार आहेत. दरम्यान, कायद्याला आपलं काम करू द्या, असं पक्षाच्या वरिष्ठ नेत्यांनी म्हटलंय. सगळ्या चोरांचं नाव मोदी कसं? असं लोकसभा निवडणुकीतील एका भाषणादरम्यान राहुल गांधी म्हणाले होते. यावरून आक्षेप घेत राहुल गांधींविरोधात मानहानीचा खटला दाखल करण्यात आला होता. सुरतमधील कोर्टात हजर झाल्यानंतर आज राहुल गांधी यांनी सुनावणीसाठी हजर न राहण्याची विनंती कोर्टाला केलीय. यावर कोर्ट १० डिसेंबरला निर्णय देणार आहे. दरम्यान, सुरतमध्ये पोहोचल्यानंतर राहुल गांधींनी ट्विट केलंय. मला गप्प करण्यासाठी विरोधकांनी खटले भरलेत. मी आज सुरतमध्ये आलोय. इथं जमलेल्या काँग्रेस कार्यकर्त्यांच्या समर्थनाबद्दल मी आभारी आहे, असं राहुल गांधींनी म्हटलंय. काँग्रेसने केला बचाव कोर्टाने राहुल गांधींना समन्स बजावले होते. त्यामुळे ते सुरतमध्ये आले. कोर्टाचा निर्णय येईल. पण तोपर्यंत कायद्याला आपलं काम करू द्यावं. न्यायाधीश निर्णय देतील. त्याप्रमाणेच पुढील कारवाई होईल, असं पक्षाचे वरिष्ठ नेते अहमद पटेल यांनी सांगितलं. तर सत्ताधाऱ्यांना विरोधकांच्या टीकेचा सामना करायला हवा. ललित मोदी आणि नीरव मोदी चोर आहेत आणि नरेंद्र मोदी अपयशी. पण भाजपने मोदी समाजाशी हे वक्तव्य जोडले आणि त्यांचा अपमान केला, असं पक्षाचे नेते शक्तिसिंह गोयील म्हणाले. राहुल गांधींची उद्या अहमदाबादच्या कोर्टात हजेरी मानहानीच्या आणखी एका प्रकरणात राहुल गांधी अहमदाबादमधील एका कोर्टात उद्या ११ ऑक्टोबरला हजर होणार आहेत. त्यांच्याविरोधात जिल्हा सहकारी बँकेचे अध्यक्ष अजय पटेल यांनी खटला दाखल केलाय. राहुल गांधी यांनी या बँकेवर घोटाळ्याचा आरोप केला होता. नोटाबंदीच्या काळात बँकेने जुन्या नोटा देऊन ७५० कोटी रुपयांच्या नव्या नोटा घेतल्या, असं राहुल गांधी म्हणाले होते. या प्रकरणी राहुल गांधींना जुलैमध्ये जामीन मिळाला होता.
