श्रीनगर: नियंत्रण रेषेजवळ नापाक कारवाया करणाऱ्या पाकिस्तानला भारतीय लष्करानं जोरदार दणका दिला आहे. काश्मीरमधील तंगधारमध्ये दहशतवाद्यांना घुसखोरीसाठी मदत करणाऱ्या पाकिस्तानी सैन्यानं सुरुवातीला गोळीबार केला. त्याला भारतीय जवानांनी सडेतोड उत्तर दिलं. चार ते पाच पाक सैनिकांना भारतीय जवानांनी ठार केलं. अनेक पाकिस्तानी सैनिक जखमी झाले आहेत, अशी माहिती आहे. ही कारवाई सुरू असतानाच, लष्कराच्या जवानांनी पाकव्याप्त काश्मीरमध्ये घुसून दहशतवाद्यांचे चार ते पाच अड्डे उद्ध्वस्त केले. यात आतापर्यंत दहापेक्षा अधिक दहशतवादी ठार झाल्याचं सांगण्यात येत आहे. गेल्या काही महिन्यांपासून भारतात घुसखोरी करण्याचा प्रयत्न करणाऱ्या दहशतवाद्यांना पाकिस्तानकडून मदत केली जात असल्याचं समोर आलं आहे. जम्मू-काश्मीरमधील तंगधार सेक्टरमध्येही रविवारी सकाळी सीमेपलीकडून काही दहशतवाद्यांनी घुसखोरीचा प्रयत्न केला. त्यांना मदत करण्यासाठी पाकिस्तानी सैन्यानं बेछुट गोळीबार केला. यात भारतीय लष्कराचे दोन जवान शहीद झाले. तसंच एका नागरिकाचा मृत्यू झाला. तर अन्य दोघे जखमी झाले आहेत. शस्त्रसंधीचं उल्लंघन करणाऱ्या पाकिस्तानी सैन्याला भारतीय सुरक्षा दलाच्या जवानांनीही सडेतोड उत्तर दिलं आहे. प्रत्युत्तरादाखल भारतीय जवानांनीही धडक कारवाई केली. त्यात पाकिस्तानचे चार ते पाच सैनिकांना ठार करण्यात आलं आहे, अशी माहिती सूत्रांकडून मिळते. ही कारवाई सुरू असतानाच, घुसखोरीला प्रोत्साहन देणाऱ्या पाकिस्तानला धडा शिकवण्यासाठी भारतीय लष्करानं थेट पाकव्याप्त काश्मीरमध्ये घुसून धडक कारवाई केली. भारतीय जवानांनी पाकव्याप्त काश्मीरमधील नीलम खोऱ्यातील दहशतवाद्यांचे चार ते पाच अड्डे उद्ध्वस्त केले. अड्ड्यांवर उखळी तोफांचा मारा केला. यात दहापेक्षा अधिक दहशतवाद्यांचा खात्मा केल्याची माहिती मिळते. तंगधारमध्ये दोन जवान शहीद पाकिस्तानी सैन्यानं काश्मीर खोऱ्यातील कुपवाडा जिल्ह्यातील तंगधार सेक्टरमध्ये रविवारी सकाळी सीमेपलीकडून घुसखोर पाठवण्याचे प्रयत्न केले. या घुसखोरांना संरक्षण देण्यासाठी पाकिस्तानच्या सैन्यानं शस्त्रसंधीचं उल्लंघन केलं. पाकिस्तानच्या सैन्यानं केलेल्या गोळीबारात भारतीय सुरक्षा दलाचे दोन जवान शहीद झाले. तर एका नागरिकाचा मृत्यू झाला. या व्यतिरिक्त तीन नागरिक जखमी झाले आहेत. रिपोर्ट्सनुसार, पाकिस्तानी सैन्याने केलेल्या गोळीबारात परिसरातील दोन घरांचे नुकसान झाले आहे. भारतीय सुरक्षा दलाच्या जवानांनीही पाक सैन्यांना चोख प्रत्युत्तर दिलं आहे.
