मुंबई: व्हिडिओकॉन ग्रुपला दिलेल्या कर्जामुळं गोत्यात आलेल्या आयसीआयसीआय बँकेच्या माजी मुख्य कार्यकारी अधिकारी (सीईओ) यांच्या आयुष्यावरील बायोपिक लवकर प्रदर्शित होणार असल्याची चर्चा होत असतानाच या चित्रपटाच्या प्रदर्शनावर दिल्ली हायकोर्टानं बंदी घातली आहे. 'चंदा: ए सिग्नेचर दॅट रुन ए करीयर' () असं या चित्रपटाचं नाव आहे. 'या चित्रपटाची कथा चंदा कोचर यांच्या आयुष्यावर आधारित आहे. त्यामुळं चंदा कोचर यांचे वकील विजय अग्रवाल आणि नमन जोशी यांनी चित्रपटाच्या प्रदर्शनावर बंदी घालण्याची मागणी केली होती. अशा प्रकारचा चित्रपट प्रदर्शित होत असल्याची माहिती चंदा कोचर यांना नुकतीच मिळाली. या चित्रपटासाठी किंवा चंद्रा कोचर यांच्या नावाचा वापर करण्यासाठी कोणतीही परवानगी चित्रपट निर्मात्यांनी घेतली नव्हती. कोचर यांच्या विरोधात सध्या सीबीआय आणि ईडीद्वारे चौकशी सुरू असून हे प्रकरण कोर्टात आहे. त्यामुळं या चित्रपटावर कोचर यांच्या वकीलांकडून आक्षेप घेण्यात आला होता. चित्रपटाच्या नावातही चंदा कोचर यांच्या नावाचा स्पष्ट उल्लेख आहे. तसंच मुख्य भूमिका साकारणारी अभिनेत्री मुलाखतींमध्ये कोचर यांच्या खासगी आयुष्यावर उघडपणे बोलत आहे. त्यामुळं याच्या चंदा कोचर यांच्या खटल्यावर परिणाम होण्याची शक्यता आहे, असा युक्तीवाद कोचर यांच्या वकिलाने दिल्ली उच्च न्यायालयाच युक्तीवाद केला. त्यामुळं न्यायालयानं या चित्रपटाच्या प्रदर्शनावर बंदी आणण्याचा निर्णय घेतला. अभिनेत्री गुरलीन चोप्रा ही चंदा कोचर यांच्या भूमिकेत दिसणार असून ती प्रसार माध्यमांच्या प्रतिनिधींना मुलाखती देताना कोचर यांच्या आयुष्याबद्दल खुलेपणानं बोलत आहे. असं बोलणं चुकीचं असून यामुळं सीबीआय चौकशी प्रभावित होण्याची शक्यता असल्याचंही कोचर यांच्या वकिलांनी म्हटलं. त्यामुळं या चित्रपटावर सध्या तरी या चित्रपटाच्या प्रदर्शनावर दिल्ली हायकोर्टाकडून बंदी घालण्यात आली आहे. चंदा कोचर यांच्या चौकशीचं प्रकरण नेमके काय?चंदा कोचर या 'आयसीआयसीआय बँके'च्या कर्ज समितीवर असताना २०१२मध्ये व्हिडीओकॉन समूहाला ३,२५० कोटी रुपयांचं कर्ज देण्यात आलं होतं. कोचर यांचे पती दीपक यांनी स्थापन केलेल्या न्यू पॉवर रीनीवेबल्स या कंपनीमध्ये व्हिडिओकॉनचे प्रवर्तक वेणूगोपाल धूत यांनी भरीव गुंतवणूक केली होती. सीबीआयनं या प्रकरणी कोचर यांच्याविरोधात गुन्हा दाखल केला होता.
