नवी दिल्लीः आज पूर्ण देशात भारताचे पहिले पंतप्रधान पंडित जवाहर लाल नेहरू यांचा जन्मदिवस म्हणून साजरा केला जातो. या बालदिनानिमित्त गुगलनंही डुडलच्या माध्यमातून शुभेच्छा दिल्या आहेत. विशेष म्हणजे हे डुडल सात वर्षांच्या विद्यार्थिनीनं साकारलं आहे. गुगलकडून बालदिनानिमित्त दरवर्षी विद्यार्थ्यांसाठी एका स्पर्धेचं आयोजन केलं जातं आणि त्यातून एक बेस्ट डुडल गुगलच्या होम पेजसाठी निवडलं जातं. या वर्षीचं डुडल गुरुग्राम येथील दिव्यांशी सिंघलनं साकारलं आहे. गुगलने घोषित केलेल्या या स्पर्धेत 'When I grow up, I hope...'हा विषय डुडल बनवण्यासाठी देण्यात आला होता. सात वर्षांच्या दिव्यांशीनं 'वॉकिंग ट्री' या संकल्पनेवर आधारित डुडल रेखाटलं आहे. डुडलमध्ये तिनं झाडांना चालताना दाखवलं आहे. गंमत म्हणजे तिच्या चित्रात तिनं झाडांना बूटही घातले आहेत. पुढच्या पीढीपर्यंत जंगलांचे व झाडांचे महत्त्व पोहोचावे हा त्या मागचा उद्देश. गेल्या दहा वर्षांपासून गुगलकडून या स्पर्धेच आयोजन केलं जातं. अनेक विद्यार्थीही या स्पर्धेत सहभागी होतात. बालदिनाचा इतिहास भारताचे पहिले पंतप्रधान जवाहरलाल नेहरू लहान मुलांमध्ये रमायचे आणि त्यांच्या लाघवी स्वभावामुळे मुलांनाही ते आपलेसे वाटायचे. २७ मे १९६४ ला पंडितजींचे निधन झाले. चिमुरड्यांच्या लाडक्या 'चाचा' नेहरूंना आदरांजली म्हणून त्यांच्या जन्मदिनी अर्थात १४ नोव्हेंबरला भारतात 'बाल दिन' साजरा करण्याचा निर्णय घेण्यात आला. या दिवशी शाळेत विविध कार्यक्रमांचे आयोजन केले जाते. जगभरात १९२५ पासून 'बाल दिन'साजरा केला जातो. संयुक्त राष्ट्र संघाने २० नोव्हेंबर १९५४ ला बाल दिन साजरा करण्याची घोषणा केली होती. भारतात मात्र १९६४ नंतर १४ नोव्हेंबरला 'बाल दिन' साजरा केला जाऊ लागला.
