म. टा. खास प्रतिनिधी, मुंबई: सध्या डॉक्टरांचे खराब दिवस सुरु आहे, तुमच्या विरोधात आमच्याकडे तक्रार आहे. एक कोटी रुपये द्या नाहीतर, हैद्राबादसारख्या डॉक्टरसारखी अवस्था होईल! अशा शब्दांत अंधेरीतील प्रसिद्ध जिल्ला क्लिनिकच्या डॉक्टरना धमकाविण्यात आल्याचा धक्कादायक प्रकार समोर आला आहे. डॉक्टरने केलेल्या तक्रारीवरून डी. एन. नगर पोलिसांनी गुन्हा दाखल करीत तीन कथित पत्रकारांना गुरुवारी अटक केली. आयव्हीएफ तंत्रज्ञानावर टेस्ट टयूब बेबी, गर्भधारणा समस्या यांचे निरासन करण्यासाठी जिल्ला आयव्हीएफ सेंटरची देशभरात क्लिनिकची मोठी साखळी आहे. अंधेरी लिंक रोडवरील चार बाजार या ठिकाणी असलेल्या क्लिनिकमध्ये दोन तरुण बुधवारी गेले. त्यावेळी क्लिनिकमध्ये एक महिला डॉक्टर आणि तिचा फार्मासिस्ट भाऊ होता. 'मुंबई आवाज वेब न्यूज' या वेब पोर्टलचे पत्रकार असून तुमच्याविरोधात एका महिलेने तक्रार केली असल्याचे या दोघांनी उपस्थित डॉक्टरला सांगितले. विशेष म्हणजे ही तक्रार त्यांनी पोलिस आयुक्तांनाही दिल्याचे हे दोघे म्हणाले. या तक्रारीच्या आधारे तुमच्या विरोधात आम्ही बातमी करणार आहोत. बदनामी टाळायची असेल तर खर्च करावा लागेल असे सांगून फार्मसिस्ट भावाला घेऊन हे दोघे त्यांच्या चार बंगला येथील कार्यालयात गेले. या ठिकाणी असलेल्या व्यक्तीची संपादक म्हणून ओळख करून दिल्यानंतर या संपादकाने फार्मसिस्ट तरुणाला धमकी दिली. 'दोन दिवसांत एक कोटी रुपयांची व्यवस्था करा नाहीतर तुमच्या विरोधात बातमी करू. डॉक्टरांचे दिवस सध्या वाईट असून सांभाळून रहा. हैद्राबाद येथे काय झाले याची कल्पना आहे ना' अशा शब्दांत या संपादकाने धमकावले. वाचा: वाचा: फार्मसिस्ट भावाला पुन्हा क्लिनिकमध्ये जाऊन हा सर्व प्रकार डॉक्टर बहिणीला सांगितला. दोघेही खूप घाबरले आणि त्यांनी थेट डी. एन. नगर पोलिस ठाणे गाठले. प्रकरणाचे गांभीर्य लक्षात घेत याप्रकरणी अपहरण, खंडणी आणि धमकीचा गुन्हा दाखल करीत वरिष्ठ पोलिस निरीक्षक परमेश्वर गणमे यांच्या मार्गदर्शनाखालील निरीक्षक पांचाळ, उपनिरीक्षक दुर्गेश साळुंखे, सूर्यवंशी यांच्यासह भोळे, सोनार, शेख यांच्या पथकाने त्वरित तपास सुरु केला. प्राथमिक तपासामध्ये सहभाग आढळल्यानंतर पोलिसांनी महेश, चेतन आणि शैलेश या तीन कथित पत्रकारांना अटक केली. गुन्हा घडला ते ठिकाणी आंबोली पोलिस ठाण्याच्या हद्दीत येत असल्याने हा गुन्हा त्या पोलिस ठाण्यात वर्ग करून तिन्ही आरोपींना त्याच्या ताब्यात देण्यात आल्याचे डी. एन. नगर पोलिसांनी सांगितले. वाचा:
