नवी दिल्ली: जवाहरलाल नेहरू विद्यापीठातील विद्यार्थ्यांवर झालेल्या प्राणघातक हल्ल्याची जबाबदारी हिंदू रक्षा दल या संघटनेने घेतली आहे. संघटनेचा अध्यक्ष पिंकी चौधरीचा एक व्हिडिओ सोशल मीडियावर व्हायरल होत आहे. पिंकी चौधरीने म्हटले की, जेएनयूमध्ये सुरू असलेले आंदोलन आम्ही खपवून घेणार नाही. हे विद्यार्थी आपल्याच देशात खातात, शिकतात. देशविरोधी कारवायांना आम्ही विरोध करणार असल्याचे त्यांनी सांगितले. देशविरोधी कृत्यांमध्ये जो कोणी सहभागी असेल त्यांना अशाच प्रकारे उत्तर देणार असल्याचा इशारा पिंकी चौधरीने दिला. मागील काही वर्षांपासून जेएनयू हा कम्युनिस्टांचा अड्डा बनला आहे आणि आम्ही हे अड्डे सहन करणार नसल्याचेही पिंकी चौधरीने म्हटले. रविवारी रात्री, चेहरा झाकून आलेल्या काहीजणांनी जेएनयू कॅम्पसमध्ये शिरुन तोडफोड करत विद्यार्थ्यांवर प्राणघातक हल्ला केले होते. जखमी झालेल्या विद्यार्थ्यांमध्ये जेएनयू विद्यार्थी संघटनेच्या आयूषी घोष हिचाही समावेश होता. या प्रकरणी अद्याप कोणालाही अटक करण्यात आली नाही. दरम्यान, पोलिसांना प्रकरणी हिंदू रक्षा दलाचा सहभाग अद्याप कोणतेही पुरावे सापडले नाहीत. पिंकी शर्माला याआधीदेखील अटक करण्यात आली होती. दिल्लीचे मुख्यमंत्री अरविंद केजरीवाल यांच्या कार्यालयावर पिंकी शर्मा आणि त्याच्या काही सहकाऱ्यांनी दगडफेक केली होती.
