तेहरान, इराणः युक्रेनचं प्रवासी विमान क्षेपणास्त्र हल्ल्यात पाडल्याची कबुली इराणने दिली आहे. इराणच्या लष्कराने ही मानवी चूक असल्याचं म्हटलंय. इराणच्या हल्ल्यात विमानातील १७६ प्रवाशांचा मृत्यू झाला होता. 'युक्रेनच्या विमानाचा तेहरानजवळील अपघात क्षेपणास्त्राच्या माऱ्यामुळे झाला नव्हता, याबाबत आम्हाला पूर्ण विश्वास आहे,' असा दावा इराणचे नागरी हवाई उड्डाणप्रमुख अली आबेदजाहेद यांनी शुक्रवारी केला होता. अमेरिका आणि इराणमध्ये संघर्ष पेटला असताना इराणमध्ये विमान दुर्घटना घडल्याने सुरुवातीपासूनच त्याकडे संशयाने पाहिले जात होते. इराणने इराकमधील अमेरिकेच्या लष्करी तळांवर हल्ला करत २२ क्षेपणास्त्रे डागली होती. त्यानंतर अवघ्या काही तासांत ही विमान दुर्घटना घडली होती. यामुळे हे विमान पाडण्यात आल्याचा संशय व्यक्त करण्यात येत होता. इराणमधील विमान दुर्घटनेच्या चौकशीसाठी युक्रेनने संयुक्त राष्ट्रांकडे मदत मागितली होती. या घटनांनंतर इराणने विमान पाडल्याची कबुली दिली आहे. अमेरिकेचे राष्ट्राध्यक्ष डोनाल्ड ट्रम्प यांनीही इराणनेच युक्रेनचे विमान पाडल्याचा दावा केला होता. तसंच कॅनडा आणि ब्रिटननेही इराणच्या क्षेपणास्त्र हल्ल्यात युक्रेनचे विमान कोसळल्याची माहिती गुप्तचरांच्या माध्यमातून मिळल्याचं म्हटलं होतं. युक्रेन इंटरनॅशनल एअरलाइन्सचे प्रवासी विमान बुधवारी तेहरानजवळच कोसळून १७६ जणांचा मृत्यू झाला होता. उड्डाणानंतर इंजिनात बिघाड झाल्याने हा अपघात झाल्याचे सांगण्यात येत होते. बोइंग ७३७ प्रकारचे हे विमान (पीएस ७५२) तेहरान विमानतळावरून सकाळी सहा वाजून दहा मिनिटांनी युक्रेनमार्गे कॅनडाकडे जाण्यासाठी उडाले होते. मात्र, दोन मिनिटांतच त्याचा रडारशी संपर्क तुटला आणि विमानतळापासून ४५ किलोमीटर वायव्येला शहरयार प्रांतातील खलज अबाद येथे ते कोसळले होते. मृतांमध्ये ८२ इराणी आणि ६३ कॅनेडीयन नागरिकांचा समावेश होता. १५ बालकांचाही यात मृत्यू झाला. इराणमधील सर्वोत्कृष्ट असलेल्या शरीफ विद्यापीठातील १३ विद्यार्थीही या विमानात होते.
