मुंबई : करोनाची धास्ती मनात बाळगलेल्या गुंतवणूकदारांनी विक्रीचा सपाटा कायम ठेवल्याने गुरुवारी सकाळच्या सत्रात शेअर बाजारात मोठी पडझड झाली आहे. मुंबई शेअर बाजाराचा सेन्सेक्स ४०० अंकांनी घसरला. राष्ट्रीय शेअर बाजाराचा निफ्टी ११० अंकांनी घसरला. बाजार उघडता चौफेर विक्रीचा मारा सुरु झाला. ऑटो, एनर्जी, बँकिंग, इन्फ्रा या प्रमुख क्षेत्रात गुंतवणूकदारांनी विक्री केली. करोनाच्या शिरकावाने गुंतवणूकदार नकारात्मक मानसिकतेत आहेत. काल परकीय संस्थात्मक गुंतवणूकदारांनी बाजारात ३३३६ कोटींची विक्री केली. अमेरिकन शेअर बाजारांमध्ये सलग पाचव्या दिवशी घसरण झाली. आज सिंगापूर शेअर बाजार ९३ अंकांनी घसरला. ऑस्ट्रेलिया आणि जपानमधील निर्देशांकात घसरण झाली. डाऊ जोन्स १२३ अंकांनी घट झाली. आजच्या सत्रात एशियन पेंट्स, सन फार्मा, कोटक बँक, नेस्ले, एलअँडटी, आयटीसी, एचयूएल, एचडीएफसी, मारुती, एचडीएफसी बँक, इन्फोसिस, बजाज ऑटो, अल्ट्राटेक सिमेंट, ऍक्सिस बँक, महिंद्रा, एसबीआय हे शेअर घसरले आहेत. निफ्टीवर येस बँक आणि बंधन बॅंकेचा शेअर तेजीत आहे. जागतिक कमॉडिटी बाजारात खनिज तेलाच्या किमतीतील घसरण कायम आहे. खनिज तेलाच्या किमती ७७ सेंट्सने कमी होऊन ५२. ६६ डॉलर प्रती औंस खाली आला आहे. जानेवारी २०१९ नंतरचा हा कमी दर आहे. भारताचा तिसऱ्या तिमाहीतील विकासदराची आकडेवारी लवकरच सरकारकडून जाहिर केली जाणार आहे. त्याशिवाय आज वायदेपूर्ती असल्याने नफावसुली होण्याची शक्यता शेअर बाजार विश्लेषकांनी व्यक्त केली आहे.
