नवी दिल्ली : यांनी सोमवारी रात्री एक पोस्टद्वारे सोशल मीडियावर एकच खळबळ उडवून दिलीय. 'सोशल मीडियातून संन्यास घेत असल्याची' माहिती पंतप्रधानांनी दिलीय. पंतप्रधान नरेंद्र मोदी यांचं सोशल मीडिया प्रेम तर सगळ्यांनाच आता ठावूक झालंय. आत्तापर्यंत आपल्या अनेक घोषणा सोशल मीडियाद्वारेच करणाऱ्या पंतप्रधान मोदींचा 'सोशल मीडिया मोहभंग' झालाच कसा? हा प्रश्न त्यांच्या चाहत्यांना भंडावून सोडतोय. त्यामुळेच पंतप्रधानांच्या ट्विटनंतर थोड्याच वेळात 'नो सर' ट्रेन्ड करायला लागलं. मंगळवारी सकाळीही हा टॉप ट्रेन्ड होता. हा हॅशटॅग वापरून चाहते पंतप्रधानांना सोशल मीडियातून बाहेर न पडण्याची विनंती करत आहेत. 'अनेक त्रुटी असल्या तरी हे शक्तीशाली माध्यम आहे' असं पंतप्रधानांचे चाहते त्यांना समजावण्याचा प्रयत्न करत आहेत. सोबतच ट्विटरवर #IWillAlsoLeaveTwitter आणि #NoModiNoTwitter हे दोन हॅशटॅगही ट्रेन्डींगवर आहेत. पंतप्रधान ज्यांना फॉलो करतात अशांनीही #nosir हॅशटॅग वापरत पंतप्रधानांना सोशल मीडिया न सोडण्याचा सल्ला दिलाय. आत्तापर्यंत ७० हजारांहून अधिक जणांनी पंतप्रधानांच्या या ट्विटवर रिप्लाय केलाय. तर ३० हजारांहून अधिक जणांनी पंतप्रधानांचं ट्विट रिट्विट केलंय. महेश हेगडे या ट्विटर युझरनं 'ज्या दिवशी तुम्ही ट्विटर सोडाल त्यादिवशी मीदेखील सोडेल. तेव्हापर्यंत तुमचा फोटो माझा डीपी राहील' असं ट्विट केलंय. तर भारत त्यागी नावाच्या युझरनं 'सर आमचं हृदय तोडू नका' असं ट्विट केलंय. एकानं 'कुछ कुछ होता है' सिनेमातला एका फोटो वापरत 'तुस्सी जा रहे हो, तुस्सी ना जाओ' असं ट्विट केलंय. तर एथिएस्ट कृष्णा नावाच्या युझरनं एक जुना व्हिडिओ ट्विट करत 'नो सर' म्हटलंय.
