नवी दिल्ली : नुकतेच इटलीहून भारतात परतलेले काँग्रेसचे नेते राहुल गांधी यांनी बुधवारी दिल्लीतल्या दंगलग्रस्त भागाचा दौरा केला. यावरून भाजपनं राहुल गांधी यांच्यावर निशाणा साधलाय. यांनी राहुल यांच्यावर टीका करताना 'राहुल गांधींनी अगोदर हे सांगावं की इटलीहून परतल्यानंतर त्यांनी आपली तपासणी केली की नाही?' असं म्हणत या दौऱ्याचा संबंध करोनाशीच जोडून टाकला. दक्षिण दिल्लीहून भाजपचे खासदार बिधुडी यांनी, राहुल गांधींना मायदेशात परतल्यानंतर सर्वात अगोदर वैद्यकीय तपासणी करण्याचा सल्ला दिला. सध्या दिल्लीतही करोना फैलावत असल्याचं समोर येतंय. उल्लेखनीय म्हणजे, इटलीमध्ये करोना व्हायरसमुळे मृत्यू झालेल्या लोकांची संख्या १०० पर्यंत पोहचलीय. 'करोना हा संसर्गजन्य रोग आहे. त्यामुळे राहुल गांधींनी लोकांपर्यंत जाण्याअगोदर स्वत:ची वैद्यकीय चाचणी करायला हवी होती' असं बिधुडी यांनी म्हटलं. काँग्रेस नेते राहुल गांधी बुधवारी दंगलग्रस्त भागाच्या दौऱ्यावर होते. 'ही शाळा हिंदुस्तानचं भविष्य आहे. इथं द्वेष आणि हिंसेमुळे हे भविष्य धोक्यात आहे. यामुळे कुणाचाच फायदा होणार नाही. हिंसा आणि द्वेष हे प्रगतीचे शत्रू आहेत. हिंदुस्तानला जाळलं जातंय. त्यामुळे भारत मातेचा कोणताही फायदा होणार नाही. इथं सर्वांना एकत्र येऊन प्रेमानेच काम करावं लागेल' असं राहुल गांधी यांनी ब्रजपुरी भागातील एका शाळेसमोर उभं राहून म्हटलं. तर भाजप खासदार रमेश बिधुडी यांनी दिल्ली हिंसाचारावर बोलण्याऐवजी राहुल गांधींना निशाण्यावर घेतलं. 'राहुल गांधी नुकतेच इटलीहून परतलेत. विमानतळावर त्यांची करोना चाचणी झाली की नाही, हे मला माहीत नाही. परंतु, त्यांनी लोकांध्ये जाण्यापूर्वी हे सांगायला हवं की त्यांनी करोना व्हायरस चाचणी केली किंवा नाही. लोकांच्या सुरक्षेसाठी हे आवश्यक आहे'. आत्तापर्यंत भारतात करोना व्हायरचे २९ रुग्ण समोर आले आहेत. यामध्ये इटलीहून भारतात आलेल्या १४ पर्यटकांचाही समावेश आहे.
