तेल अवीव: इस्राएलमध्ये मागील एकाच वर्षात झालेल्या तिसऱ्या निवडणुकीतही कोणत्याही पक्षाला स्पष्ट बहुमत मिळाले नाही. बेंझामिन नेतन्याहू यांच्या पक्षाच्या आघाडीला बहुमतापेक्षा अवघ्या तीन जागा कमी मिळाल्यात. दरम्यान, नेतन्याहू यांनी आपल्या पक्षाचा ऐतिहासिक विजय झाला असल्याचा दावा ट्विटरवर केला आहे. याआधी झालेल्या दोन निवडणुकांमध्येही बेंझामिन नेतन्याहू यांच्या पक्षाला बहुमत मिळाले नव्हते. इस्राएलच्या राजकीय इतिहासात हा आतापर्यंतचा सर्वाधिक मोठा 'डेडलॉक' समजला जात आहे. इस्राएलमध्ये कोणत्याही पक्षाला, आघाडीला सत्ता स्थापनेसाठी ६१ जागांची आवश्यकता असते. मतदानानंतर जाहीर झालेल्या एक्झिट पोलनुसार नेतन्याहू यांच्या लिकुड पक्षाला आणि आघाडीला ६१ जागा मिळतील असा अंदाज व्यक्त करण्यात आला होता. गुरुवारी जाहीर झालेल्या निवडणूक निकालानुसार, लिकुड पक्षाला ३६, विरोधी पक्ष ब्लॅक अॅण्ड व्हाईट पार्टीला ३३ जागा मिळाल्यात. इतर पक्षांसोबत आघाडी केल्यानंतर नेतन्याहू यांच्या पक्षाच्या आघाडीचे संख्याबळ ५८ होत आहे. इस्राएलच्या संसदेत १२० जागा आहेत. पाहा: निकालानंतर बेंझामिन नेतन्याहू यांनी हा आपला ऐतिहासिक विजय असल्याचे म्हटले आहे. विरोधक आपल्या पक्षाला सत्तेवर येण्यापासून रोखत असल्याचा आरोप त्यांनी केला. ब्लॅक अॅण्ड व्हाइट पक्षाशिवाय इतर छोट्या पक्षांना १५ जागा मिळाल्या आहेत. मात्र, हे लहान पक्ष एकत्र येण्याची शक्यता धूसर असल्याची शक्यता आहे. मागील वर्षभरात इस्राएलमध्ये तीन वेळेस निवडणुका झाल्या आहेत. याआधी एप्रिल, सप्टेंबरमध्ये झालेल्या निवडणुकीत कोणत्याही पक्षाला बहुमत मिळाले नव्हते. आणखी वाचा:
