मुंबई: करोनाचा प्रादुर्भाव रोखण्यासाठी मुंबईत केलेल्या विविध उपाययोजनांमुळे पालिकेला रुग्णसंख्या दुप्पट होण्याचा कालावधी रोखण्यात यश आलं आहे. सध्या मुंबईतील रुग्णसंख्या दुप्पट होण्याचा कालावधी ७वरून १० दिवसांवर पोहोचला असून हा कालावधी राष्ट्रीय सरासरीच्या ९.५ टक्क्यापेक्षा चांगला असल्याचं पालिकेनं म्हटलं आहे. दोन दिवसांपूर्वीपर्यंत मुंबईत प्रत्येक सात दिवसांनी रुग्णांची संख्या दुप्पट होत होती. त्यामुळे मुंबईतील करोनाबाधितांची संख्या झपाट्याने वाढत होती. मात्र, फिरते फिवर क्लिनिक, कॉन्टॅक्ट ट्रेसिंग, घरोघरी जाऊन ज्येष्ठ नागरिकांची तपासणी, कंटेन्मेंट झोन सील करणं, कुणालाही घरातून बाहेर पडण्यास मनाई करणं, अत्यावश्यक कारणांसाठी घराबाहेर पडताना मास्कशिवाय घराबाहेर पडण्यास मज्जाव करणं, फिजिकल डिस्टन्सिंगचं काटेकोरपणे पालन करणं आदी विविध उपयायोजना पालिकेने आधीपासूनच मुंबईत सुरू केल्या होत्या. त्याचा परिणाम म्हणून रुग्णसंख्या दुप्पट होण्याचा कालावधी वाढवण्यात पालिकेला यश आलं आहे. पालिकेने आज दिलेल्या माहितीनुसार सध्या मुंबईत प्रत्येक १० दिवसांनी रुग्णांची संख्या दुप्पट होत असून राष्ट्रीय सरासरीपेक्षा हा आकडा समाधानकारक असल्याचं म्हटलं आहे. तसंच मुंबईतील मृत्यूदर ३.७ एवढा असून हा दर राज्य आणि देशाच्या तुलनेत चांगला असल्याचं पालिकेनं स्पष्ट केलं आहे. दरम्यान, मुंबईतील सध्याची रुग्ण संख्या ५९८२ आहे.
