म. टा. प्रतिनिधी । पूर्ववैमनस्यातून दहा जणांच्या टोळक्याने एका तरुणाची धारदार शस्त्राने सपासप वार करून हत्या केल्याची घटना काल रात्री अकरा वाजण्याच्या सुमारास सासवड रोड भेकराईनगर येथे घडली. याबाबत हडपसर पोलिसांनी खुनाचा गुन्हा दाखल केला असून दोघांना ताब्यात घेतले आहे. शोएब मस्जीद शेख (वय १९, भेकराईनगर, फुरसुंगी ) असं मृत तरुणाचं नाव आहे. या प्रकरणी निलेश भाऊसाहेब मेमाणे (वय २६, रा. ढमाळवाडी, फुरसुंगी ) यांनी फिर्याद दिली आहे. त्यानंतर आरोपी जीवन कांबळे व त्याच्या इतर साथीदारांविरोधात हडपसर पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, हडपसर परिसरात मृत शोएब 'सरकार राज' नावाची टोळी चालवायचा. एक वर्षापूर्वी वर्चस्वाच्या वादातून जीवन कांबळे याच्यावर शोएब याने वार केले होते. या गुन्ह्यात शोएबला शिक्षा झाली होती. सहा महिन्यांपूर्वी येरवडा कारागृहातून तो जामिनावर बाहेर आला होता. शोएबने जीव मारण्याचा प्रयत्न केल्याचा राग जीवन कांबळे व त्याच्या साथीदारांमध्ये होता. शुक्रवारी रात्री पावणे अकरा वाजण्याच्या सुमारास शोहेब हा दुचाकी वरून घरी जात होता. त्यावेळी असेंट कारमधून कांबळे व त्याचे साथीदार यांनी शोएबच्या दुचाकीला धडक दिली. गाडीच्या धडकेत शोएब रस्त्यावर पडला असता कारमध्ये असलेल्या टोळक्यानं हातातील धारदार कोयत्यानी शोएबवर हल्ला चढवला. पोटावर, डोक्यावर गंभीर जखमा झालेल्या शोएबचा जागीच मृत्यू झाला. शोएबचा मृत्यू झाल्याचं खात्री पटल्यानंतर सर्व आरोपी सासवड रोडच्या दिशेने फरार झाले. शोएबचा जोडीदार निलेश मेमाणे यानं हडपसर पोलिसांकडे तक्रार दिली. शोएबसह कांबळे देखील पोलिसांच्या रेकॅार्डवरील गुन्हेगार आहे. पोलिसांनी जंगलात केला आरोपींचा पाठलाग खून करून आरोपी हे सासवडच्या पुढे वाघापूर येथे जंगलात जाऊन लपले होते, याची माहिती हडपसर पोलिसांना मिळाली. त्यानंतर रात्री तीन वाजण्याच्या तपास पथकातील सहायक पोलीस निरीक्षक संजय चव्हाण, पोलीस कर्मचारी नितीन मुंडे, अकबर शेख, शाहिद शेख, विनोद शिवले, प्रताप गायकवाड यांनी वाघापूरच्या जंगलात टॉर्चच्या साहाय्याने पाठलाग सुरू केला. आठ ते दहा जण आरोपी पुढे पळत होते. पाठीमागे पाच पोलीस पाठलाग करत होते. अखेर आरोपी कांबळे व त्याच्या एका साथीदाराला पकडण्यात पोलिसांना यश आले. बाकीचे आरोपी अंधाराचा फायदा घेऊन पसार झाले.
