मुंबई: मैत्रिणीची छेड काढणाऱ्यांविरोधात पोलिसांत दाखल करणं एका तरुणाला महागात पडलं आहे. पोलिसात तक्रार नोंदवली म्हणून ५ ते ७ जणांच्या टोळक्याने या तरुणाला बेदम मारहाण करत त्याची हत्या केल्याची धक्कादायक घटना चेंबूरच्या वाशीनाका येथे घडली आहे. याप्रकरणी आरसीएफ पोलिसांनी गुन्हा नोंदविला असून अधिक तपास सुरू आहे. चार दिवसांपूर्वी आरोपी आशिष आणि त्याच्या एका मित्राने एका मुलीची छेड काढली होती. त्यामुळे मयत प्रशांत पानवलकरने आशिषला हटकले होते. त्यामुळे दोघांमध्ये वादावादी होऊन शिवीगाळही झाली होती. त्यानंतर प्रशांतने पोलिसात जाऊन आशिष विरोधात छेड काढल्याची तक्रार नोंदवली होती. त्यामुळे आशिष संतापला होता. मंगळवारी संध्याकाळी प्रशांत पीठ घेण्यासाठी घराबाहेर पडला होता. त्यावेळी आशिषसह सात लोकांनी त्याला घेरले आणि जोरदार मारहाण सुरू केली. या घटनेची माहिती मिळताच प्रशांतच्या भावाने घटनास्थळी धाव घेऊन प्रशांतला गुंडांच्या तावडीतून सोडवण्याता प्रयत्न केला. मात्र या सात जणांनी प्रशांतवर धारदार शस्त्रांनी वार केला. त्यामुळे जखमी प्रशांतला रुग्णालयात नेले असता त्याला मृत घोषित करण्यात आले. याप्रकरणी आरसीएफ पोलीस ठाण्यात गुन्हा दाखल करण्यात आला असून सातही जणांना पोलिसांनी अटक केली आहे. त्याआधी करोनामुळे पोलिसांनी छेडछाडीच्या प्रकरणी कुणालाही अटक केली नव्हती. मात्र, हत्येची घटना घडल्याने पोलिसांनी या सातही जणांना अटक करून अधिक तपास सुरू केला आहे.
