हिंगोली: गेल्या काही दिवसांपासून करोनाच्या विळख्यात सापडलेल्या एसआरपीएफ जवानांवरील करोनाचं संकट अद्यापही टळलेलं नाही. हिंगोलीत आज पुन्हा २२ जवानांना करोनाची लागण झाल्याची धक्कादायक माहिती समोर आली आहे. तर एका परिचारिकेलाही करोनाची लागण झाल्याने हिंगोलीतील करोनाबाधितांची संख्या ७६वर पोहोचली आहे. हिंगोलीतील एकूण ७६ करोनाबाधितांपैकी २९ रुग्ण हे एसआरपीएफचे जवान असल्याने आरोग्य प्रशासनाची डोकेदुखी वाढली आहे. मालेगाव आणि मुंबईत बंदोबस्ताला गेलेल्या हिंगोलीतील जवानांचे टप्प्याटप्प्याने अहवाल येत आहेत. हे सर्व जवान मुंबई आणि मालेगावच्या हॉटस्पॉटमध्ये बंदोबस्तांवर होते. त्यातील १९४ पैकी हिंगोलीच्या ४६ तर जालन्याच्या एका अशा ४७ जवानांना करोनाची लागण झाली होती. आज नव्याने प्राप्त झालेल्या अहवालानुसार १९४ जवानांपैकी २२ जवानांचे अहवाल पॉझिटिव्ह आले आहेत. एकूण बाधित जवानांपैकी ३४ जवान मालेगाव तर ३५ जवान मुंबई येथून कर्तव्य बजावून आले होते. तर उपचार करणाऱ्या परिचारिकेला प्राथमिक लक्षणे आढळून आल्यानंतर तिचे स्वब नमुने तपासणीसाठी पाठविण्यात आले होते. अहवाल आल्यानंतर तिलाही करोनाची लागण झाल्याचं आढळून आले आहे. विशेष बाब म्हणजे सुरुवातीस बाधित आढळलेल्या जवानांचा १४ दिवसानंतरचा अहवाल पॉझिटिव्ह आला आहे. या पूर्वी एका रुग्णाने करोनावर मात केल्याने त्याला डिस्चार्ज देण्यात आला आहे. ४ जवानांना मधूमेह व उच्चरक्तदाब असल्याने त्यांना औरंगाबादला पुढील उपचारासाठी पाठवण्यात आले आहे.
