पालघर: पालघरमध्ये दोन साधूंसह तिघांच्या झालेल्या हत्येप्रकरणी पोलिसांनी १०१ जणांना अटक केली असली तरी या हत्याकांडातील आणखी काही आरोपी जंगलात लपून बसल्याचा पोलिसांना संशय आहे. त्यामुळे पोलिसांच्या अनेक टीम या जंगलात जाऊन आरोपींचा शोध घेत आहे. मात्र जंगल घनदाट असल्याने या आरोपींचा शोध घेण्यासाठी पोलिसांनी ड्रोनची मदत घेतली आहे. १६ एप्रिल रोजी रात्री जिल्ह्यातील गडचिंचले गावात स्थानिक जमावाने दोन साधू आणि त्यांच्या चालकाची अमानुषपणे हत्या केली होती. त्याचे देशभर पडसाद उमटल्याने पोलिसांनी अवघ्या ४८ तासांत १०१ आरोपींना अटक केली होती. तसेच सुमारे ५०० लोकांविरोधात गुन्हे दाखल केले होते. याप्रकरमी ६ पोलिसांना निलंबित करण्यात आल होते, तसेच पालघर पोलीस ठाण्यातील अनेक कर्मचाऱ्यांची बदलीही केली होती. दरम्यान, या घटनेनंतर पोलिसांनी धरपकड सुरू केल्याने अनेक आरोपी जंगलात पळून गेल्याचं सांगण्यात येतं. साधूंच्या हत्येला २० दिवस उलटले तरी काही आरोपी अजूनही जंगलात लपलेले आहेत. या आरोपींना पकडण्यासाठी पालघर पोलिसांच्या अनेक टीम जंगलामध्ये शोध घेत आहेत. मात्र, आरोपींना पकडण्यात पोलिसांना अद्याप यश आलेलं नाही. या जंगलात आरोपींनी त्यांच्या राहण्या-खाण्याची व्यवस्था सुरू केली असल्याचं बोललं जात आहे. जंगलात भांडी सापडल्याने त्यावरून अंदाज व्यक्त केला जात आहे. त्यामुळे पोलिसांनी आता ड्रोनद्वारे या आरोपींचा जंगलात शोध सुरू केला आहे.
