म. टा. प्रतिनिधी, : जिल्ह्यातील करोनाबाधितांचा आकडा वाढतोच आहे. शहर परिसरात आज आणखी १६ बाधित रुग्ण सापडले आहेत. त्यामुळं जिल्ह्यातील करोना रुग्णांची एकूण संख्या १३०१ झाली आहे. तर आतापर्यंत जिल्ह्यात ५० करोनाबाधितांचा मृत्यू झाला आहे. औरंगाबाद जिल्हा करोना 'हॉटस्पॉट' ठरत आहे. शहर परिसरात नव्याने आढळलेल्या बाधितांमध्ये बोस नगर, एन ११, हडको येथील ४, भवानी नगर २, रोशन गेट १, हुसेन कॉलनी १, बायजीपुरा १, इटखेडा, पैठण रोड १, अल्तमश कॉलनी १, जवाहर नगर, गारखेडा परिसर १, शाह बाजार १, मयूर नगर, एन-६, सिडको १, राम नगर, एन-२मध्ये १, गजानन मंदिर परिसर एका रुग्णाचा समावेश आहे. आज सापडलेल्या बाधितांमध्ये १० महिला आणि ६ पुरुषांचा समावेश आहे. जालन्यात करोनाचे १० नवे करोना रुग्ण जालना जिल्ह्यात करोनाचा कहर दिवसेंदिवस वाढतच चालला आहे. सोमवारी दहा नवीन रुग्णांची भर पडली असून जिल्ह्यात करोनाग्रस्त रुग्णांची संख्या ७१ झाली आहे. जिल्हा रुग्णालयातर्फे शनिवारी १०६ संशयित रुग्णांच्या लाळेचे नमुने तपासणीसाठी पाठविण्यात आले होते. त्याचे अहवाल रविवारी रात्री उशिरा प्राप्त झाले. यात शहरातील जुना जालना भागातील नामांकित असलेल्या एका खासगी रुग्णालयाशी संबंधित पाच जणांचे अहवाल पॉझिटिव्ह आले. जालना तालुक्यातील पिरपिंपळगाव प्राथमिक आरोग्य केंद्रांतर्गत असलेल्या नूतनवाडी येथील २,अंबड तालुक्यातील पिरनेर येथील १, मंठा तालुक्यातील हनुमंतखेडा आणि कानडी येथील प्रत्येकी एक अशा एकूण दहा नवीन रुग्णांचा समावेश आहे. त्यात सहा महिला व चार पुरुष असल्याचे जिल्हा शल्यचिकित्सक डॉ. मधुकर राठोड यांनी सांगितले.
