नवी दिल्ली: आज सोमवारपासून देशभरात लॉकडाउनचा तिसरा टप्पा सुरू होत आहे. या दोन आठवड्यांच्या वाढीव लॉकडाउनची घोषणा केंद्र सरकारने शुक्रवारी केली. देशभरातील करोनाची लागण झालेल्या रुग्णांच्या संख्येने ४० हजारांचा आकडा पार केल्यानंतर हा लॉकडाउनचा तिसरा टप्पा सुरू होत आहे. सध्या करोनाग्रस्तांच्या संख्येनुसार, देशात रेड, ऑरेन्ज आणि ग्रीन झोननुसार विभागणी करण्यात आली आहे. त्यानुसारच जिल्ह्यांना किती सूट मिळणार हे ठरवण्यात आलेले आहे. याचाच अर्थ आजपासून ग्रीन झोनमध्ये येणाऱ्या देशातील ३१९ जिल्ह्यांना दिलासा मिळणार आहे. या जिल्ह्यांमध्ये सर्वाधिक सूट मिळणार आहे. तर ऑरेन्ज आणि रेड झोनमध्ये काही प्रमाणात सूट दिली जात आहे. पाहुयात, ही सूट कशा प्रकारे मिळणार आहे... केंद्र सरकारने देशातील एकूण ३१९ जिल्हे ग्रीन झोन, २८४ जिल्ह्यांना ऑरेन्ज झोन आणि १३० जिल्हे रेड झोन घोषित केले आहेत. रेड झोनमध्ये काय बंद असेल? > विमान वाहतूक, ट्रेन, बस, मेट्रो प्रवास पूर्णपणे बंद. > रस्तेमार्गाने दुसऱ्या राज्यातील प्रवास बंद. > सर्व शिक्षण संस्था बंद. > हॉटेल,रेस्टॉरंट्स, चित्रपटगृह, मॉल्स बंद. > धार्मिक ठिकाणे, मोठ्या संभा बंद > न्हाव्याची दुकाने, सलून, स्पा बंद. > संध्याकाळी ७ ते सकाळी ७ वाजेपर्यंत बाहेर पडणे बंद. > ६५ वर्षांहून अधिक वयाच्या व्यक्ती, १० वर्षांहून लहान मुले आणि गर्भवती स्त्रियांना बाहेस पडण्यास बंदी. > ऑटोरिक्षा आणि टॅक्सी बंद. > जिम, स्पोर्ट्स कॉम्प्लेक्स बंद. > आंतरजिल्हा बस वाहतूक बंद > दुसऱ्या राज्यांमध्ये जाणाऱ्या बसेस बंद. > ई-कॉमर्सद्वारे जीवनावश्यक नसलेल्या वस्तूंची खरेदी बंद रेड झोनमध्ये काय असेल सुरू? > औषधाची दुकाने, क्लिनिक आणि ओपीडी सुरू राहणार. > दारूची दुकाने, पानाची दुकाने, सिगारेटची दुकाने सुरू राहणार. > चार चाकी वाहने सुरू, (मात्र चालका व्यतिरिक्त दोनच व्यक्तींना प्रवासाची मुभा) > दुचाकी वाहने सुरू, (मात्र केवळ चालकालाच परवानगी) > शहरांधील उद्योगधंदे सुरू. > शहरातील बांधकामे सुरू. > शहरी भागातील दुकाने सुरू. > ई-कॉमर्सद्वारे गरजेच्या वस्तू खरेदी करणे सुरू. > घरगुती मदत सुरू. > खाजगी आणि शासकीय (नॉन केअर) सुरू, मात्र ३३ टक्के. > शेतीशी संबंधित कामे सुरू. > बँकांशी संबंधित कामे सुरू. > कुरिअर आणि पोस्ट सुरू. > सामानाच्या वाहतुकीला परवानगी.
