पुणे: करोनाच्या साथीमुळं निर्माण झालेल्या आरोग्य आणीबाणीतून मार्ग काढण्यासाठी खासगी संस्था, संघटना मोठ्या प्रमाणावर हातभार लावत आहेत. देशातील आघाडीची आयटी कंपनी असलेल्या ''नं ( Campus in ) पुण्यातील हिंजवडी कॅम्पसमधील ४० हजार चौरस फुटांची जागा करोनाग्रस्तांसाठी उपलब्ध करून दिली आहे. या जागेवर ४५० खाटांचं तात्पुरतं रुग्णालय उभारण्यात येणार आहे. 'विप्रो'चे अध्यक्ष रिषाद प्रेमजी यांनी ही माहिती दिली. याशिवाय कंपनीनं याबाबत एक सविस्तर पत्रकही प्रसिद्ध केलं आहे. त्यानुसार येत्या ३० मे पर्यंत कंपनीची जागा सरकारला सुपूर्द करण्यात येणार आहे. वर्षभरानंतर पुन्हा एकदा ती कंपनीच्या ताब्यात घेतली जाणार आहे. या जागेवर उभारण्यात येणाऱ्या रुग्णालयामध्ये करोनाची सौम्य लक्षणं असलेल्या रुग्णांवर उपचार केली जातीलच, पण त्याचबरोबर तीव्र लक्षणं असलेल्या व प्रकृती चिंताजनक असलेल्या रुग्णांवर उपचार करण्यासाठी खास १२ खाटा राखीव असतील, असं कंपनीच्या पत्रकात म्हटलं आहे. मुख्यमंत्री उद्धव ठाकरे यांनी 'विप्रो'च्या या योगदानाचं कौतुक केलं आहे. विप्रोच्या या मदतीमुळं आरोग्य सेवा अधिक मजबूत होईल व आरोग्य कर्मचाऱ्यांनाही फायदा होईल,' असं मुख्यमंत्र्यांनी म्हटल्याचं पत्रकात नमूद करण्यात आलं आहे. जागेच्या हस्तांतरणाची प्रक्रिया लवकरात लवकर पूर्ण व्हावी यासाठी कंपनीनं एक विशेष टीम तयार केली आहे. लवकरच ही टीम काम सुरू करणार आहे, असं विप्रोचे पुणे विभागाचे प्रमुख दीपक त्रेहान यांनी सांगितलं. 'कोविड १९'ची साथ आल्यापासून विविध क्षेत्रांतून मदतीचा ओघ सुरू आहे. कुणी आर्थिक स्वरूपात मदत करत आहेत. तर, कुणी वैद्यकीय साधने पुरवत आहेत. यात राज्यातील खासगी कंपन्या, उद्योजक, सामाजिक संस्थांसह बॉलिवूड सेलिब्रिटींचाही समावेश आहे. याआधी टाटा, रिलायन्स, महिंद्रा अँड महिंद्रा अशा अनेक मोठ्या कंपन्यांनी रुग्ण सेवेसाठी आपल्या मालकीच्या जागा उपलब्ध करून दिल्या आहेत.
