बीजिंग: लडाखमधील गलवान खोऱ्यात मागील आठवड्यात भारत-चीनच्या सैन्यामध्ये झालेल्या संघर्षानंतर दोन्ही देशांमध्ये वाढलेला तणाव कमी होण्याची चिन्ह दिसत नाहीत. एकीकडे युद्ध सरावाच्या नावाखाली चीनने मोठ्या प्रमाणावर शस्त्राशस्त्रे आणि सैन्यांची जमवाजमव सुरू केली आहे. अशातच मागील काही दिवसात चीनच्या लढाऊ विमानांची हालचाल वाढली असल्याचे समोर आले आहे. चीनकडून चर्चेच्या माध्यमातून तणाव निवळला जाऊ शकतो, असे म्हटले जात असताना दुसऱ्या बाजूला सैन्याच्या हालचाली वाढल्या आहेत. चीनच्या या कावेबाजाला लक्षात घेऊन भारतीय लष्कर आणि हवाई दलही सतर्क झाले आहेत. चीनच्या जे-१०, जे-११ यासारख्या लढाऊ विमानांनी सीमानजिकच्या भागातील आकाशात दिसत असल्याचे समोर आले आहे. त्यानंतर भारतीय हवाई दलाच्या मिग-१९, सुखोई एसयू ३०, एमकेआय आणि 'टँक किलर'अपाचे यांनीही आकाशात गस्त घालणे सुरू केले आहे. वाचा: बेलफर सेंटर संस्थेने मार्च महिन्यात प्रकाशित केलेल्या एका अभ्यास अहवालानुसार, भारताजवळ जवळपास २७० लढाऊ विमान असून ६८ ग्राउंड अॅटक फायटर जेट आहेत. त्याशिवाय भारताने मागील दशकात चीनच्या लगतच्या सीमा भागात धावपट्टींचीही निर्मिती केली आहे. याचा मोठा फायदा हवाई दलाला होणार आहे. तर, चीनची पीपल्स लीबरेशन आर्मीचे हवाई दल भारताशी लागून असलेल्या सीमा क्षेत्रातील आठ ठिकाणांचा वापर करते. मात्र, त्यातील बहुतांश हे नागरी हवाई क्षेत्र आहेत. वाचा: दरम्यान, भारत-चीन दरम्यान तणाव वाढला असताना चीनचे राष्ट्रपती शी जिनपिंग यांनी आपल्या वरिष्ठ लष्करी अधिकाऱ्यांना निर्देश दिले आहेत. चिनी सैन्य दलाच्या उच्च-गुणवत्तेच्या विकासास चालना देण्यासाठी सैन्य दलाच्या व्यवस्थापनातील पद्धती सुधारण्याचे निर्देश शी जिंनपिंग यांनी गुरुवारी दिले असल्याची माहिती चीनमधील माध्यमांनी दिली आहे. भारत-चीन दरम्यान तणाव वाढले असताना जिनपिंग यांनी आदेश दिल्यामुळे चर्चा सुरू झाल्या आहेत. राष्ट्रपती शी जिनपिंग हे चीनच्या तिन्ही सैन्य दलाचे प्रमुख आहेत. लष्करी प्रशिक्षण व व्यवस्थापनाबाबत टेली-कॉन्फरन्सवर झालेल्या चर्चेत त्यांनी हे निर्देश दिले असल्याची माहिती 'शिन्हुआ' या सरकारी वृत्तसंस्थेने दिले आहे. चीनने भारतसोबतच्या प्रत्यक्ष नियंत्रण रेषेवर आक्रमक भूमिका घेतली असताना त्यांनी आपल्या सैन्याधिकाऱ्यांसोबत बैठक घेतली आहे. भारताच्या ३४८८ किमी लांबीच्या प्रत्यक्ष नियंत्रण रेषेवर तणावाची परिस्थिती निर्माण झाली आहे. त्याशिवाय दक्षिण चीन समुद्रात अमेरिका आणि चीन आमनेसामने आले आहेत. त्यामुळेच शी जिनपिंग यांच्या या बैठकीकडे गांभीर्याने पाहिले जात आहे. आणखी वाचा:
