मुंबई- स्थलांतरीत मजुरांसाठी लॉकडाउन हा कठीण काळ आहे. पण त्यांच्या मदतीसाठी अनेक सिनेसृष्टीतील सेलिब्रिटी धावून आले आहेत. सोनू सूदनंतर अभिनेता मनीष पॉलनेही या श्रमिकांच्या मदतीसाठी हात पुढे केला आहे. नुकतीच त्याने ४० मजुरांची मदत केली ज्यांना स्वघरी जायचे होते. त्या श्रमिकांना घरी पाठवताना त्याने त्यांच्या अन्नधान्याची सोयही केली यासोबतच प्रवासात काही त्रास होऊ नये म्हणून पैसेही दिले. आता मनिषने मुंबई आणि दिल्ली येथे रस्त्यावरून चालत जाणाऱ्या ५०० हून अधिक श्रमिकांना चपला दिल्या आहेत. मनिषने याआधी २० लाखांची मदत केली होती. एवढंच नाही तर त्याच्याकडे काम करणाऱ्या कर्मचाऱ्यांना त्याने आधीच पगार दिला होता. काही दिवसांपूर्वी त्याने व्हॉट इफ हा लघुपट यूट्यूबवर शेअर केला होता. या लघुपटात लॉकडाउनवर एक सामाजिक संदेश देण्यात आला आहे. या सिनेमातून मिळणारं उत्पन्नही मनिषने करोनाग्रस्तांच्या मदतीसाठी देऊ केलं. याबद्दल बोलताना मनिष म्हणाला की, 'करोनाचे परिणाम देशभर दिसत आहे. देशजणू थांबला आहे. दर दिवशी मृतांच्या संख्येत वाढ होत आहे. प्रत्येकजण अडचणीत आहे. यात स्थलांतरीत श्रमिकांना जास्त अडचणी आहेत. दर दिवशी हजारो श्रमिक त्यांच्या घरी जाण्यासाठी पायी चालत जात आहेत. यात अनेक दुर्घटनाही घडतात. या सर्व गोष्टी मनाला फार त्रास देतात.' एकमेकांची मदत करत पुढे कसं जावं याचं हे उत्तम उदाहरण असल्याचं अनेकांचं म्हणणं आहे. दरम्यान, मनिष पॉलप्रमाणेच रोनानंतरच्या लॉकडाऊनच्या काळात स्थलांतरीत मजुरांसाठी केलेल्या कामामुळं 'रिअल' लाइफमध्येही हिरो ठरलेल्या अभिनेता सोनू सूद याचं सर्वच स्तरांतून कौतुक होत आहे. सोनूचं मदत कार्य थांबता थांबत नाहीए. गेले काही दिवस रोज सुमारे अठरा तासांहून अधिक काळ सोनू फोन आणि सोशल मीडियाच्या माध्यमातून सर्वसामान्यांना मदत करण्यात व्यग्र असतो. बसमधून श्रमिकांना पाठवताना सुरक्षित वावराचे नियम तो पाळतो. आसनक्षमता ६० असलेल्या बसमधून तो ३५ प्रवाशांना पाठवतो. या प्रवाशांच्या जेवण-खाण्याची व्यवस्थाही तो करतो.
