मुंबई : लॉकडाउन शिथिल होताच किमान तीन आठवडे पेट्रोल आणि डिझेलचा भाव वाढविणाऱ्या पेट्रोलियम कंपन्यांनी आंदोलनाचा चांगलाच धसका घेतला आहे. आज सलग सातव्या दिवशी पेट्रोल आणि दरात कोणताही बदल केलेला नाही. तेल वितरक कंपन्यांनी ७ जूनपासून दरवाढीचा सपाटा लावला होता. यावर नागरिकांमध्ये संतापाची लाट होती. याशिवाय विरोधी पक्षांनी सरकारविरोधात आंदोलनाची हाक दिली होती. गेल्या आठवड्या पेट्रोल डिझेल दरवाढीविरोधात रस्त्यावर आंदोलने झाली. गेल्या सोमवारी कंपन्यांनी पेट्रोल आणि डिझेलमध्ये शेवटची दरवाढ केली होती. त्यानंतर सलग सात दिवस इंधन दर स्थिर ठेवले आहेत. इंडियन ऑइलच्या दर पत्रकानुसार सोमवारी मुंबईत पेट्रोलचा भाव प्रती लीटर ८७.१९ असून डिझेल दर ७८.८३ रुपयांवर कायम आहे. राजधानी दिल्लीत पेट्रोलचा भाव ८०.४३ रुपयांवर स्थिर आहे. डिझेलचा भाव ८०.५३ रुपये प्रती लिटर आहे. चेन्नईत पेट्रोल ८३.६३ रुपये आणि कोलकात्यात ८२.१० रुपये आहे. चेन्नईत डिझेल ७७.७२ रुपये आणि कोलकात्यात ७५.६४ रुपये आहे. लॉकडाउन शिथिल केल्यानंतर सार्वजनिक वाहतुकील परवानगी देण्यात आली आहे. त्यामुळे गेल्या महिन्यात पेट्रोल आणि डिझेलची मागणी वाढली. जूनमध्ये ११.८ दशलक्ष टन पेट्रोलियम उत्पादनांची विक्री झाली आहे. हे प्रमाण आता टाळेबंदी पूर्व स्थितीवर आले आहे. जूनमध्ये पेट्रोलचा खप ८५ टक्के तर डिझेलचा खप ८२ टक्के झाला. जून २०१९ मध्ये १३.४ दशलक्ष टन पेट्रोलियम उत्पादनांची विक्री झाली होती. जागतिक बाजारात कच्च्या तेलाचा भाव ४० डॉलर प्रती बॅरल आहे. त्यात शुक्रवारी १.२८ टक्क्याची घट झाली. तर ब्रेंट क्रूडचा भाव ४२.६१ डॉलर प्रती बॅरल होता. त्यात १.२३ टक्के घसरण झाली. मार्च महिन्यात कच्च्या तेलाचा भाव शून्याखाली गेला होता. मात्र देशात २५ मार्चपासून लॉकडाऊन जाहीर झाल्यानंतर पेट्रोलियम कंपन्यांनी ८३ दिवस पेट्रोल आणि डिझेलचे दर स्थिर ठेवले होते. देशातील इंधन दर जागतिक बाजाराशी सलग्न करण्यात आले आहेत. त्यामुळे दररोज सकाळी ६ वाजता कंपन्या पेट्रोल आणि डिझेलचा भाव निश्चित करतात. सध्या जागतिक बाजारातला क्रूडचा भाव ४० डाॅलरच्या आसपास असल्याने देशातील पेट्रोल आणि डिझेल महागच आहे. त्यात केंद्र आणि राज्य सरकारचा कर लादलेला आहे. कंपन्यांना आता इंधन दरात कपात करावी अशी मागणी केली जात आहे.
प्रमुख शहरातील पेट्रोल आणि डिझेलचे आजचे दर
| शहर |
पेट्रोल |
डिझेल |
| मुंबई |
८७.१९ |
७८.८३ |
| दिल्ली |
८०.४३ |
८०.५३ |
| चेन्नई |
८३.६३ |
७७.७२ |
| कोलकाता |
८२.१० |
७५.६४ |
