मुंबई : कमॉडीटी बाजारातील तेजी आणि करोनाने बेजार झालेल्या अर्थव्यवस्थेला तारण्यासाठी आर्थिक पॅकेजची उत्सुकता लागलेल्या गुंतणूकदारांकडून खरेदीचा सपाटा सुरु आहे. त्यामुळे बुधवारी सकाळच्या सत्रात मुंबई शेअर बाजाराच्या सेन्सेक्सने ४०० अंकांची झेप घेतली आणि ३८००० अंकांचा पल्ला पुन्हा एकदा ओलांडला. राष्ट्रीय शेअर बाजाराच्या निफ्टीत देखील ११५ अंकांची वाढ झाली असून तो ११२१० अंकांवर आहे. मंगळवारी सेन्सेक्सने ७४८ अंकांची भरपाई केली होती. दोन सत्रात सेन्सेक्स ११०० अंकांनी वधारला आहे. यामुळे गुंतवणूकदारांची मालमत्ता किमान तीन लाख कोटींनी वाढली आहे. चालू आठवड्यात व्हाईट हाऊसकडून अमेरिकन अर्थव्यवस्थेसाठी पॅकेज जाहीर केले जाण्याची शक्यता आहे. त्यामुळे जगभरातील भांडवली बाजारात उत्साही वातावरण निर्माण झाले आहे. मंगळवारी अमेरिकेन शेअर बाजार तेजीसह बंद झाले तर आज आशियात संमिश्र वातावरण आहे. वाचा : आज मुंबई आणि राष्ट्रीय शेअर बाजारात सकाळपासून तेजीचा ट्रेंड दिसून आला. बाजार उघडताच बँका, वित्त संस्था, ऑटो, आयटी या क्षेत्रात खरेदी दिसून आली. आयसीआयसीआय बँक, सन फार्मा, इंडसइंड बँक, टाटा स्टील, ऍक्सिस बँक, रिलायन्स, बजाज फायनान्स, अल्ट्राटेक सिमेंट , कोटक बँक, एसबीआय, बजाज ऑटो, टायटन, एल अँड टी, महिंद्रा अँड महिंद्रा, एचडीएफसी, आयटीसी आदी शेअर वधारले. एचयूएल, नेस्ले, पॉवर ग्रीड या शेअरवर दबाव दिसून आला. भांडवली बाजारांत सोमवारी बरीच पडझड झाल्याच्या पार्श्वभूमीवर, मंगळवारी निर्देशांक मोठ्या प्रमाणावर उसळले. मुंबई शेअर बाजाराचा निर्देशांक सेन्सेक्स ७४८.३१ अंकांची उसळी घेत ३७,६८७.९१ वर बंद झाला. राष्ट्रीय शेअर बाजाराचा निर्देशांक निफ्टी २०३.६५ वर जात ११,०९५.२५ या स्तरावर स्थिरावला. मारुती, अॅक्सिस बँक, एचडीएफसी, आयसीआयसीआय बँक व बजाज फायनान्स या कंपन्यांचे समभाग वधारले. त्याचवेळी टेक महिंद्र, इंडसइंड बँक, एचसीएल टेक, अल्ट्रा सिमेंट व इन्फोसिस या कंपन्यांचे समभाग पडले. दिवसभरात गुंतवणूकदारांकडून विशिष्ट कंपन्यांनाच पसंती दिल्याचे स्पष्टपणे दिसून आले. विदेशी गुंतवणुकीचा ओघ वाढत असलेला भांडवल बाजारांना पहायला मिळाला. त्यामुळेही गुंतवणूकदार सुखावले. बाजारांकडून मिळालेल्या माहितीनुसार, सोमवारी विदेशी गुंतवणूकदार संस्थांनी ७,८१८.४९ कोटी रुपयांचे समभाग खरेदी केले. आशियाई भांडवल बाजारही सकारात्मक पातळी गाठत बंद झाले. युरोपातील भांडवल बाजारही सकारात्मक राहिले. अमेरिकी व चीन यांच्यातील तणावाचा कोणताही परिणाम गुंतवणूकदारांवर दिसला नाही.
