मुंबई: अयोध्येतील राम मंदिरासाठी भाजपचे आमदार आर. एन. सिंह एक कोटी रुपये देणार आहेत. तशी घोषणाच त्यांनी केली असून मंदिरचे ट्रस्ट डॉ. अनिल मिश्र यांच्याशी चर्चाही केली आहे. आर. एन. सिंह हे भाजपचे आमदार असून उद्योगपतीही आहेत. तसेच मुंबईतील उत्तर भारतीय संघाचे ते अध्यक्षही आहेत. ईश्वरानेच जनतेची सेवा करण्याची संधी दिली त्यामुळे आपण कार्यरत आहोत, असं सांगतानाच आरटीजीएसच्या माध्यमातून लवकरच राम मंदिर ट्रस्टला एक कोटी रुपयांचा निधी दिला जाणार असल्याचं सिंह यांनी सांगितलं. या आधी सिंह यांनी करोना व्हायरस रोखण्यासाठी पंतप्रधान मदत निधीमध्येही निधी दिला आहे. राम मंदिरासाठी अनेक लोकांनी आपलं बलिदान दिलं आहे. बऱ्याच संघर्षानंतर अखेर राम मंदिराचं काम सुरू होत आहे. त्यामुळे राम मंदिराच्या मदतीसाठी सर्वांनीच पुढे यायला हवं. अयोध्येत भव्यदिव्य राममंदिर होण्यासाठी सर्वांनीच पुढे यायला हवं. नवा इतिहास लिहिला जातोय. त्याचे आपण सर्वांनी साक्षीदार झालं पाहिजे, असंही त्यांनी सांगितलं. दरम्यान, यापूर्वी राम मंदिरासाठी शिवसेनेने एक कोटी रुपयांची आर्थिक मदत केली आहे. मुख्यमंत्री उद्धव ठाकरे यांच्या वाढदिवशीच मंदिर ट्रस्टकडे हा निधी सुपूर्द करण्यात आला आहे. दरम्यान, अयोध्येतील राम मंदिराच्या निर्माणा दरम्यान अर्थ मंत्रालायाकडून एक नवा आदेश जारी करण्यात आलाय. या नव्या आदेशानुसार, राम मंदिर उभारणीसाठी आर्थिक मदत करणाऱ्यांना दिली जाणार आहे. एक नोटिफिकेशन काढून सरकारनं ही घोषणा केलीय. ही सूट केवळ श्रीराम जन्मभूमी तीर्थ क्षेत्र ट्रस्टला मदत केल्यानंतरच मिळणार आहे. अर्थ मंत्रालयाकडून, आयकर कायदा १९६१ च्या कलम ८० जी नुसार ही सूट देण्यात येईल. 'श्रीराम जन्मभूमि तीर्थक्षेत्र ट्रस्ट'ची निर्मिती याच वर्षी करण्यात आलीय. मंदिर उभारणीसाठी देशातील अनेक भाविक भरभरून मदत करत आहेत. या दानावर आयकरातून सूट मिळवण्यासाठी ट्रेस्टला दिल्या गेलेल्या देणगीची पावती तुमच्याकडे असणं आवश्यक आहे. यामध्ये ट्रस्टचं नाव, पत्ता, पॅन क्रमांक, दान देणाऱ्याच्या नावाचा उल्लेख आणि दानाची राशी नमूद केलेली असायला हवी. कलम ८० जीनुसार, सर्व धार्मिक ट्रस्टला सूट दिली जात नाही. धार्मिक ट्रस्टला अगोदर कलम ११ आणि १२ नुसार, आयकरातील सूटसाठी रजिस्ट्रेशन अर्ज सादर करावा लागतो. त्यानंतर कलम ८० जी नुसार ही सूट दिली जाते. अर्थ मंत्रालयानं तीर्थक्षेत्राचा उल्लेख ऐतिहासिक महत्त्वाचं स्थान तसेच सार्वजनिक पूजेचं प्रसिद्ध स्थान म्हणून केलाय.
