मुंबई : कमॉडिटी बाजारात सोने आणि चांदीच्या दरात सोमवारी वाढ झाली आहे. सलग दुसऱ्या सत्रात मौल्यवान धातूंच्या किमती वधारल्या आहेत. आज सोमवारी सोने २४० रुपयांनी महागले आहे. सोन्याचा भाव प्रती १० ग्रॅम ५१६८८ रुपये आहे. चांदीचा भाव पुन्हा एकदा ७० हजारांवर गेला आहे. याच महिन्यात सुरुवातीला स्थानिक कमॉडिटी बाजारात सोन्याने ५६२०० रुपयांचा विक्रमी स्तर गाठला होता. तर जागतिक बाजारात सोने प्रती औंस २०५१ डॉलरपर्यंत पोहचले होते. त्यानंतर सोन्याची मागणीत घट झाली आहे. सराफा बाजारात सोन्याचा खप कमी झाला असल्याचे कोटक सिक्युरिटीजने म्हटलं आहे. त्यामुळे किमतीत घसरण होत आहे. आज मल्टी कमॉडिटी एक्सचेंजमध्ये सोन्याचा भाव प्रती १० ग्रॅम ५१६८८ रुपये झाला आहे. त्यात आतापर्यंत २४० रुपयांची वाढ झाली. चांदीने ७० हजांरांचा टप्पा ओलांडला आहे. चांदीचा भाव १२९० रुपयांनी वाढला असून तो एक किलोला ७०१२८ रुपये झाला आहे. goodreturns या वेबसाईटनुसार आज सोमवारी मुंबईत २२ कॅरेट सोन्याचा भाव ५०४७० रुपये आहे. २४ कॅरेटचा भाव ५१४७० रुपये आहे. त्यात शुक्रवारच्या तुलनेत ११० रुपयांची वाढ झाली. दिल्लीत २२ कॅरेट सोने ५००२० रुपये असून २४ कॅरेटचा भाव ५४५६० रुपये आहे. कोलकात्यात २२ कॅरेट सोने ५०४३० रुपये असून २४ कॅरेटचा भाव ५३१३० रुपये आहे. चेन्नईत २२ कॅरेटचा भाव ४९१४० रुपये असून २४ कॅरेटचा भाव ५३६०० रुपये आहे. रिझर्व्ह बँकेने या वेळी सोन्याच्या बाँडच्या किमती प्रती ग्रॅमसाठी ५ हजार ११७ इतकी निश्चित केली आहे. या बाँडची खरेदी करताना जर तुम्ही डिजीटल पैसे जमा केले तर ५० रुपये सवलत दिली गेली आहे. ज्यामुळे नागरिकांना बाँड ५ हजार ०६७ रुपयांना मिळेल. ही योजना ३१ ऑगस्ट रोजी सुरू होणार आहे आणि ती ४ सप्टेंबरपर्यंत सुरू असेल. या काळात तुम्ही सोन्याची खरेदी करू शकता. तुम्ही कमीत कमी एक ग्रॅमपर्यंत सोन्याची खरेदी करू शकता. मागणी नसल्याने ट्रेडर्सकडून भरपूर सवलत गेल्या पंधरवड्यात सोने आणि चांदी दरात मोठी घसरण झाली आहे. उच्चांकी दरामुळे सोन्याच्या मागणीत घसरण झाली असून कमॉडिटी बाजारात मोठी उलथापालथ होत आहे. त्यामुळे सोन्याचे बडे साठेबाज, सराफ व्यापारी आणि ट्रेडर्स चिंतेत आहे. काहींनी सोन्याचा साठा कमी करण्यासाठी मोठी सवलत देणे सुरु केले आहे. यामुळं बाजारात सोन्यावरील सवलतीचे प्रमाण ५ महिन्यांच्या उच्चांकवर गेले आहे. गोल्ड डिस्काउंट प्रती औंस तब्बल ४३ डॉलर म्हणजे ३२०० रुपयांवर गेला आहे. विशेष म्हणजे मागील आठवड्यात सोन्याचं किमतीत जवळपास पाच हजारांची घसरण झाली आणि डिस्काउंट दुप्पट झाल्याचे जाणकारांचे म्हणणे आहे. त्याआधीच्या आठवड्यात गोल्ड डिस्काउंट प्रती औंस २० डॉलर होता. अमेरिका आणि चीनमधील व्यापारी संघर्ष आणि करोनाचा प्रकोप सोन्याच्या किमतींवर परिणाम करत आहे. चीनमधील देखील गोल्ड डिस्काउंटमध्ये वाढ झाली आहे.
