म. टा. प्रतिनिधी, शहरात कडक लॉकडाउन लावलेले असताना, शनिवारी दुपारी दोन मुली एकमेकींचा हात धरून घराबाहेर पडल्या. बस स्थानकावर आल्यानंतर कावऱ्या बावऱ्या या मुलीबाबत वाहतूक पोलिसांना संशय आला. त्यांनी या दोन्ही मुलींना बोलावून त्यांच्या घरच्याशी संपर्क करून पालकांच्या हवाली केले. एकीच्या पाठीवर बॅग होती. तर दुसरी तिचा हात धरून उभी होती. या मुलींना काही रिक्षावाल्यांनी कुठे जायचे, हे विचारले. त्या मुलींनी उत्तर दिले नाही. काही रिक्षावाले मुलींना विचारून पुढे निघून गेले. मुली अस्वस्थ्य असल्याचे दिसताच, वाहतूक पोलिस कर्मचारी कृष्णा मोरे आणि एएसआय साळवे यांनी या मुलींची चौकशी केली. त्यांना विश्वासात घेतले. त्यांच्या पालकांचा मोबाइल नंबर घेतला. त्यांच्या पालकांना फोन केला. तोपर्यंत या मुलींना वाहतूक पोलिसांनी त्यांच्या केबीनमध्ये बसवून ठेवले होते. या दोन मुलींपैकी एका मुलीची आई व त्याचा मामा सीबीएसला पोहोचले. आपल्या मुलीला पाहून आई रडायला लागली. पोलिसांनी फोन करून दुसऱ्या मुलीच्या वडिलांनाही बोलावून घेतले. वाळूज भागातून वडिलांनी सीबीएस बस स्थानक गाठले. क्रांतीचौक पोलिसांनी दोन्ही मुलींच्या पालकांचा जबाब नोंदवून दोन्ही मुलींना त्यांच्या पालकांच्या हवाली केले. रागामुळे पडल्या बाहेर पोलिसांनी मुलींसोबत केलेल्या चर्चेनंतर दोन्ही अल्पवयीन मुली या रागामुळे घराबाहेर पडल्याचे उघड झाले. बस स्थानकावर आलेल्या या मुलीना नेमकं जायचं कुठे आहे, याची कल्पना नव्हती. जर या मुली बस स्थानकात जाऊन एखाद्या बसमध्ये बसल्या असत्या आणि तेथून शहराबाहेर पडल्या असत्या तर त्यांचा शोध कठीण झाला असता. बस स्थानकावर कर्तव्य बजाविणाऱ्या पोलिसांच्या सतर्कतेमुळे मुली सुरक्षित पालकांकडे परतल्या. आणखी वाचा:
