जाणून घ्या इंधन दर ; १६ दिवसांत १२ वेळा पेट्रोल महागले

https://ift.tt/2ETweuP

मुंबई : अर्थव्यवस्थेची अनलॉकच्या दिशेने सुरु असलेली वाटचाल, इंधन मागणीत सुधारणा आणि जागतिक बाजारात कच्च्या तेलाच्या किमती स्थिर असून देखील पेट्रोलियम कंपन्यांनी इंधन दरवाढीचा सपाटा लावला आहे. मागील महिनाभरापासून डिझेलची किंमत स्थिर ठेवत कंपन्यांनी अत्यंत हुशारीने पेट्रोल दरवाढीतून ग्राहकांच्या खिशात हात घातला आहे. १६ ऑगस्टपासून तब्बल १२ दिवस पेट्रोल दरात वाढ झाली आहे. यातून पेट्रोल सरासरी १.६० रुपयांनी महागले आहे. इंडियन ऑइलच्या आकडेवारीनुसार १६ ऑगस्टपासून १६ दिवसांमध्ये चार दिवस पेट्रोलचा भाव स्थिर होता. तर उर्वरित १२ दिवसांत पेट्रोल १.६० रुपयांनी महागले आहे.कंपन्यांनी रविवारी पेट्रोल दरात ९ पैशांची वाढ केली होती. तर शनिवारी इंधन दर स्थिर ठेवला होता. त्याआधी शुक्रवारी पेट्रोल दरात ११ पैशांची वाढ केली होती तर गुरुवारी पेट्रोल १० पैशांनी महागले होते. बुधवारी पेट्रोल दरवाढीला ब्रेक लागला होता, मात्र त्यानंतर सलग दोन दिवस पुन्हा कंपन्यांनी केली. पेट्रोल दरवाढीने नजिकच्या काळात महागाईचा भडका उडण्याची शक्यता जाणकार व्यक्त करत आहेत. कंपन्यांनी रविवारी केलेल्या दरवाढीनंतर मुंबईत पेट्रोलचा भाव प्रती लीटर ८८.६८ रुपये झाला होता. तोच भाव आज सोमवारी कायम आहे. डिझेलचा भाव ८०.११ रुपयांवर स्थिर आहे. दिल्लीत पेट्रोलचा भाव ८२ रुपयांचा टप्पा ओलांडला आहे. मुंबईत पेट्रोल ८९ रुपयांच्या नजीक पोहोचले आहे. दिल्लीत आजचा पेट्रोलचा भाव ८२.०३ रुपये आणि डिझेलचा भाव ७३.५६ रुपयांवर कायम आहे. चेन्नईत पेट्रोल ८५ रुपये असून डिझेल ७८.८६ रुपये आहे. तर कोलकात्यात पेट्रोल ८३.५२ रुपये आहे. तर डिझेल ७७.०६ रुपये प्रती लीटर आहे. जागतिक बाजारात कच्च्या तेलाच्या किमतीवर परिणाम झाला आहे. मेक्सिकोच्या खाडीत लाॅरा चक्रीवादळाने धडक दिली आहे. चक्रीवादळाच्या इशाऱ्यानंतर मेक्सिकोतील बड्या तेल विहिरी बंद ठेवण्यात आल्या आहेत. त्यामुळे तेलाच्या उत्पादनात घट झाली आहे. त्याशिवाय करोना रुग्णाची वाढती संख्या कमॉडिटी बाजाराच्या चिंता वाढवणारी आहे. आज सोमवारी जागतिक बाजारात कच्च्या तेलाचा भाव २७ सेंट्सने घसरला आणि प्रती बॅरल ४६.०८ डॉलर झाला. यूएस क्रूडचा भाव ४३.११ डॉलर प्रती बॅरल असून त्यात १४ सेंट्सची वाढ झाली आहे. जागतिक बाजारात मागील महिनाभर कच्च्या तेलाचा भाव स्थिर आहे. मात्र डॉलरच्या तुलनेत रुपयाचे अवमूल्यन झाल्याने तेल आयातीचा खर्च वाढला आहे. त्यामुळे कंपन्यांनी मागील सहा दिवस पेट्रोल दरात वाढ केली होती. तर जवळपास तीन आठवडे डिझेलची किंमत स्थिर आहे. प्रमुख शहरातील आजचा पेट्रोल-डिझेलचा भाव

शहर	पेट्रोल	डिझेल
मुंबई	८८.६८	८०.११
दिल्ली	८२.०३	७३.५६
चेन्नई	८५ .००	७८.८६
कोलकाता	८३.५२	७७.०६