नवी मुंबई: नवी मुंबईतील न्हावा-शेवा बंदरात अंमली पदार्थांचा मोठा साठा जप्त केला आहे. तब्बल १ हजार कोटी रुपये किंमतीचे जप्त केले आहे. आंतरराष्ट्रीय बाजारात या हेरॉइनची किंमत १ हजार कोटी रुपये आहे. हेरॉइन अफगाणिस्तानहून पाकिस्तानमार्गे या बंदरात आणण्यात आले होते. डीआरआय आणि कस्टम विभागाने केलेल्या संयुक्त कारवाईत हा अंमली पदार्थाचा मोठा साठा जप्त केला आहे. या प्रकरणी आतापर्यंत दोघांना अटक करण्यात आली आहे, अशी माहिती अधिकाऱ्यांनी दिली. मीडिया रिपोर्टनुसार, तस्करांनी हेरॉइन प्लास्टिकच्या पाइपमध्ये लपवून ठेवले होते. हे पाइप बांबूसारखे वाटत होते अशा पद्धतीने त्यांना रंग दिला होता. आयुर्वेदिक औषध असल्याची बतावणी तस्करांनी केली. मात्र, अधिकाऱ्यांना संशय आला. तपासणी केली असता, हेरॉइन असल्याचे स्पष्ट झालं. या प्रकरणी हेरॉइन आयातीचे कागदपत्र तयार करणाऱ्या दोन कस्टम हाउसच्या एजंटना अटक करण्यात आली आहे. तसेच या प्रकरणी आणखी काही जणांना अटक करण्यात येणार असल्याचे सांगितले जाते. दिल्लीच्या एका फायनान्सरलाही अटक करण्यात आली आहे. त्याला मुंबईला घेऊन येणार असल्याचे सांगण्यात येत आहे. अटक केलेल्या दोघांना मुंबईच्या एका न्यायालयात हजर करण्यात आले आहे. त्यांना १४ दिवसांची न्यायालयीन कोठडी सुनावली आहे. हेरॉइन अनेक कंटेनरमधून आणले गेले होते. त्यामुळे कंटेनरच्या मालकांचीही चौकशी करण्यात येत आहे.
