मुंबई : करोनाचा प्रकोप सुरु असला तरी देशांतर्गत भांडवली बाजारात गुंतवणुकीचा ओघ तितक्याच वेगाने सुरु आहे. मागील आठवडाभरात आणि निफ्टीने महत्वाचे टप्पे पार केले आहेत. दोन्ही निर्देशांक सहा महिन्यांतील सर्वोत्तम स्तरावर ट्रेड करत आहेत. परदेशी संस्थामक गुंतवणूकदारांनी ऑगस्ट महिन्यात बाजारात मोठी गुंतवणूक केली आहे. आजच्या सत्रात रिलायन्स इंडस्ट्रीजचा शेअर केंद्रबिंदू राहण्याची शक्यता आहे. रिलायन्स रिटेलने नुकताच फ्युचर ग्रुपची खरेदी केली आहे. त्यामुळे किरकोळ व्यापार क्षेत्रात आता रिलायन्स इंडस्ट्रीज मोठी कंपनी बनणार आहे. यामुळे रिलायन्स इंडस्ट्रीजच्या शेअरमध्ये आज मोठी उलाढाल होईल, असे मत शेअर विश्लेषकांनी व्यक्त केले आहे. त्याप्रमाणे फ्युचर ग्रुपच्या फ्युचर कन्झुमर, फ्युचर रिटेल, फ्युचर लाईफ स्टाइल, फ्युचर सप्लाय चेन, फ्युचर मार्केट नेटवर्क या शेअरवरदेखील परिणाम होण्याची शक्यता आहे. करोना विषाणूच्या पार्श्वभूमीवर अमेरिकेच्या अर्थव्यवस्थेमध्ये विक्रमी घसरण नोंदविण्यात आली आहे. अमेरिकेच्या वाणिज्य मंत्रालयाने एप्रिल-जून तिमाहीसाठी जारी केलेल्या अहवालानुसार ३१.७ टक्क्यांची घसरण नोंदविण्यात आली आहे. यापूर्वी जुलैअखेरीस जाहीर करण्यात आलेल्या अंदाजात जूनअखेरीस अर्थव्यवस्था ३२.९ टक्क्यांनी घसरण्याची शक्यता असल्याचे नमूद करण्यात आले होते. तत्पूर्वी अमेरिकेच्या अर्थव्यवस्थेतील तिमाहीतील सर्वांत मोठी घसरण १९५८मध्ये नोंदविण्यात आली होती. त्या वेळी अर्थव्यवस्था १० टक्क्यांनी घसरली होती. जूनअखेरीस संपलेल्या तिमाहीमध्ये लॉकडाउनमुळे जगातील सर्वांत मोठी अर्थव्यवस्था असणाऱ्या अमेरिकेच्या आर्थिक घडामोडींवर मोठा परिणाम होऊन लाखो कामगार बेरोजगार झाले होते. चालू वर्षाच्या पहिल्या तिमाहीमध्येही अमेरिकी अर्थव्यवस्थेत ५ टक्क्यांची घसरण नोंदविण्यात आली होती. अमेरिकेत करोना विषाणूचे संक्रमण फेब्रुवारीपासून होण्यास सुरुवात झाली. शुक्रवारच्या सत्रात बँक आणि मिडिया स्टॉक्सला मागणी दिसून आली. बेंचमार्क निर्देशांकांनी सहा महिन्यातील उच्चांकी पातळी गाठली. निफ्टीने ८८.३५ अंकांची वृद्धी घेत ११,६४७.६० अंकावर बंद झाला होता. एसअँडपी बीएसई सेन्सेक्समध्ये ३५३.८४ अंकांची वाढ झाली व तो ३९,४६७.६० अंकांवर स्थिरावला होता.
