मुंबई : हॅपिएस्ट माइंड्स टेक्नालॉजिजच्या आयपीओसाठी अर्ज केलेल्या हजारो किरकोळ गुंतवणूकदार आणि उच्च मालमत्ता असलेले गुंतवणूकदारांचे (HNI's) आता शेअरच्या नोंदणीकडे (Listing) लक्ष लागले आहे. आज सकाळी शेअर बाजारात घंटानाद करून शेअरची लिस्टिंग होणार आहे. शेअर वाटपात (Share Allotment) निराश झालेल्या गुंतवणूकदारांना आता बाजारात शेअर सूचिबद्ध झाल्यानंतर खरेदी करता येईल. आज गुरुवारी १७ सप्टेंबर रोजी हा शेअर भांडवली बाजारात सूचीबद्ध होणार आहे. आधीच ग्रे मार्केटमध्ये या कंपनीचे शेअर १४२ ते १४६ रुपये जादा दराने मिळत आहेत. त्यामुळे १०० टक्के प्रीमियमसह शेअरची नोंदणी होईल, असा अंदाज जाणकारांनी व्यक्त केला आहे. कंपनीने आयपीओसाठी प्रती शेअर १६५ ते १६६ रुपये किंमतपट्टा निश्चित केला होता. एकूण ७०२ कोटींच्या आयपीओसाठी ५८२९४ कोटींची बोली लागली होती. १५१ पट हा सबस्क्राईब झाला. बऱ्याच कालावधीनंतर बाजारात चांगला आयपीओ आल्याने गुंतवणूकदारांनी प्रचंड प्रतिसाद दिला असल्याचे शेअर विश्लेषकांचे म्हणणे आहे.उच्च मालमत्ता असलेले गुंतवणूकदारांसाठी (HNI's) शेअरची कमाल मर्यादा १६६ रुपये असून यात ३५१.४६ पट सबस्क्रिप्शन ७ दिवस फायदा, ७ दिवसांचे व्याज असे ७८.३२ रुपये प्रती शेअर वाढतात.ग्रे मार्केटमध्ये या शेअरचा भाव २४४ रुपये चालला आहे. त्यामुळे त्यातही HNI's ६३.६८ रुपये ते ६७.६८ रुपये प्रती शेअर नफा कमवू शकतात. अलीकडच्या काळात आलेल्या २० आयपीओ इश्यूना १०० पटींहून अधिक सब्स्क्रिप्शन मिळाले होते. या योजनेत गुंतवणूकदारांना नोंदणीच्या वेळी ७० टक्के नफा मिळाला होता. ग्रे मार्केटमध्ये हॅपिएस्ट माइंड्स टेक्नालॉजिजच्या शेअरची चलती पाहता नोंदणी जोरदार होईल, असा अंदाज विश्लेषकांनी व्यक्त केला आहे. याआधी सालासार टेक्नो इंजिनिअरिंगच्या ३६ कोटीच्या आयपीओमध्ये २७३.१० पट सबस्क्रिप्शन मिळाले होते. आयपीओत कंपनीने १०८ रुपयाने शेअर इश्यू केले. प्रत्यक्षात बाजारात २५९.१५ रुपयाला शेअरची लिस्टिंग झाली. कंपनीच्या शेअरची १३९.९५ टक्के अधिक दराने नोंदणी झाली. अशाच प्रकारे जानेवारी २०१८ मध्ये अपोलो मायक्रो सिस्टमचा आयपीओ गाजला होता. या इश्यूला २४८.५ पट सबस्क्रिप्शन मिळाले होते. शेअरची ७३.८१ टक्क्यांच्या वाढीसह नोंदणी झाली होती. हॅपिएस्ट माइंड्स टेक्नालॉजिजच्या शेअरचे वाटप झाले आहे. ऍनालिस्ट झोनचे शेअर बाजार विश्लेषक दिनेश गुप्ता यांच्यानुसार सध्या ग्रे मार्केटमध्ये कंपनीचा शेअर १४०-१४५ रुपये अधिक प्रीमियमवर मिळत आहे. आज हॅपिएस्ट माइंड्स टेक्नालॉजिजला ३०८ ते ३११ च्या भावावर नोंदणी होण्याची शक्यता आहे.ज्यात गुंतवणूकदारांना किमान ८८ टक्के जादा दर मिळेल.
