मुंबई : शेअर बाजारात आज सकाळची सुरुवात दणक्यात झाली. सेन्सेक्सने २०० अंकांची झेप घेतली तर ६० अंकांनी वधारला आहे. सध्या बाजारात बँका, वित्त संस्थाच्या शेअरला मागणी आहे. एसबीआय, आयडीएफसी फर्स्ट बँक, भेल, बँक ऑफ बडोदा, फ्युचर रिटेल हे शेअर तेजीत आहेत. भारत-चीन सीमेवरील तणावामुळे भारतीय निर्देशांकात सोमवारी परिणाम झाला व तो २ टक्क्यांनी घसरला. निफ्टी २६०.१० अंकांनी घसरला आणि ११,३८७.५० वर स्थिरावला. एसअँडपी बीएसई सेन्सेक्स ८३९.०२ अंकांनी कमी होऊन ३८,६२८.२९ वर बंद झाला. सोमवारच्या सत्रात फ्युचर रिटेल १९.९९ टक्के, ओएनजीसी १.९९ टक्के, फ्युचर कंझ्युमर लि. ४.८० टक्के हे आजचे टॉप गेनर्स ठरले. तर भारती एअरटेल २.१० टक्के, रिलायन्स इंडस्ट्रिज २.१८ टक्के आणि इंडसइंड बँक ५.१३ टक्के हे सर्वाधिक नुकसान झालेले शेअर्स ठरले. सर्वच क्षेत्रात घसरण दिसून आली. मेटल आणि फार्मा निर्देशांक अनुक्रमे ४.३ टक्के आणि ५.२ टक्क्यांनी घसरले. तर निफ्टी ऑटो ३.६ टक्के घसरल्याचे एंजल ब्रोकिंग लिमिटेडचे प्रमुख सल्लागार अमर देव सिंह यांनी सांगितले. फ्युचर रिटेल लि.: रिलायन्स इंडस्ट्रिज लिमिटेडने किरकोळ आणि घाऊक व्यापारासह कंपनीच्या लॉजिस्टिक आणि वेअरहौसिंग व्यवसायासह २४,७१३ कोटी रुपयांची खरेदी केली. कंपनीच्या शेअर्समध्ये १९.९९ टक्क्याची वृद्धी झाली आणि तो १६२.३५ रुपयांवर बंद झाला. एनएचपीसी लिमिटेड: कंपनीचा एकत्रित निव्वळ नफा १७ टक्क्यांनी घसरला तर कंपनीचा एकत्रित महसूल ६.५ टक्क्यांनी वाढला. त्यामुळे कंपनीच्या शेअर्समध्ये ४.४१ टक्क्यांची घसरण झाली व तो २१.७० रुपयांवर बंद झाला. सुझलॉन एनर्जी लिमिटेड: कंपनीचे एप्रिल ते जून या तिमाहीत एकत्रित निव्वळ नुकसान ३९८ कोटी रुपयांवर गेले. कंपनीच्या शेअर्समध्ये १.३० टक्क्यांनी घट झाली व तो ३.८० रुपयांवर बंद झाला. रिलायन्स इंडस्ट्रिज लिमिटेड: कंपनीने नुकतेच किशोर बियाणी समर्थित फ्युचर ग्रुपचे किरकोळ, घाऊक वस्तू, लॉजिस्टिक आणि वेअरहाऊस व्यवसाय विकत घेतले. तरीही कंपनीचा शेअर २.१८ टक्क्यांनी घसरला व तो २,०७० रुपयांवर बंद झाला.
