नवी दिल्ली : जवळपास ३३ टक्के दिल्लीकरांमध्ये कोविडचा सामना करण्यासाठी आवश्यक असलेल्या अँटीबॉडी विकसित झाल्या असल्याचं ताज्या सेरो सर्व्हेमधून समोर आलं आहे. लेटेस्ट सेरो सर्व्हेमध्ये ११ जिल्ह्यांमधून १७ हजार नमुने घेण्यात आले होते. या सर्वेतील महत्त्वाचे मुद्दे पुढच्या आठवड्यात जाहीर केलं जाणं अपेक्षित आहे. याचाच अर्थ असा होतो की २ कोटी लोकसंख्येच्या दिल्लीत ६६ लाख जणांना करोनाची लागण झाली होती आणि त्यांच्यामध्ये अँटीबॉडी विकसित झाल्यामुळे ते बरे झाले. ऑगस्टच्या पहिल्या आठवड्यात दुसरा करण्यात आला होता, ज्यानुसार २९.०१ टक्के लोकांमध्ये कोविड अँटीबॉडी विकसित झाल्या होत्या. जूनअखेरपर्यंत करण्यात आलेल्या पहिल्या सेरो सर्व्हेपेक्षा हा आकडा २३.४ टक्क्यांनी जास्त होता. पहिल्या सर्व्हेसाठी २१ हजार, तर दुसऱ्या सर्व्हेसाठी १५ हजार नमुने जमा करण्यात आले होते. दरम्यान, हे चांगले संकेत असल्याचं अधिकारी सांगतात. अँटीबॉडी असलेल्या व्यक्तींना सध्या करोनाची लागण झालेली नाही. ते करोनातून पूर्णपणे बरे झाले आहेत. यापैकी अनेकांना आपल्याला करोनाची लागण झाली होती याची माहिती देखील नाही, असं एका अधिकाऱ्याने सांगितलं. या नमुन्यांचं विश्लेषण मौलाना आझाद वैद्यकीय महाविद्यालयाकडून करण्यात येत आहे. याच महाविद्यालयाकडून पहिले दोन सेरो सर्व्हे करण्यात आले होते. जवळपास निम्म्यापेक्षा नमुन्यांचा अभ्यास करण्यात आला असून अंतिम अहवाल येईपर्यंत अँटीबॉडी विकसित झाल्याचं सरासरी प्रमाण मोठ्या प्रमाणात वाढू शकतं, असं सूत्रांचं म्हणणं आहे. अँटॉबॉडीच्या उपलब्धतेमुळे सरकारला सूक्ष्म नियोजनासाठी आणि कोविडचा सामना करण्यासाठी धोरण आखण्यात मदत होते. १८ वर्षांखालील, १८ वर्षांवरील आणि ४९ वर्ष आणि त्यावरील अशा प्रवर्गात नमुने जमा करण्यात आले. १८-४९ या वयोगटात सर्वाधिक नमुने जमा करण्यात आले होते. सप्टेंबरच्या सुरुवातीपासूनच आरोग्य कर्मचाऱ्यांकडून नमुने जमा करण्यास सुरुवात करण्यात आली होती. दिल्ली सरकार १ ऑक्टोबरपासून आणखी एका सर्व्हेला मान्यता देण्याची शक्यता आहे. यामुळे अँटीबॉडी किती जणांमध्ये उपलब्ध आहेत याची माहिती ऑक्टोबर महिन्यातही मिळवण्यास मदत होईल. दिल्ली सध्या हर्ड इम्युनिटीकडे वाटचाल करत असल्याचं यामधून दिसून येतं. करोना विरोधात लढा देण्यासाठी धोरण आखण्यात या सर्व्हेंचा मोठा फायदा होणार आहे.
