नगर: नगर शहर जिल्हा, अहमदनगर महापालिका व पंडित दीनदयाळ नागरी सहकारी पतसंस्था यांच्या संयुक्त विद्यमाने नगरमध्ये कोविड केअर सेंटर सुरू करण्यात आले खरे. मात्र, या कोविड सेंटरवरून शिवसेनेने भाजपवर गंभीर आरोप केले आहेत. भाजपने जे सुरू केले, ते कोविड सेंटर अहमदनगर महानगरपालिकेने लक्षावधी रुपये खर्च करून उभारले आहे. 'घर घर लंगर सेवा' ही संस्था हे कोविड सेंटर चालवणार होते. त्यानुसार त्यांनी तयारी केली होती. मात्र ऐनवेळी महापौरांच्या आग्रहास्तव हा निर्णय बदलला कसा? असा प्रश्न उपस्थित करीत शिवसेनेचे उपजिल्हाप्रमुख गिरीश जाधव यांनी नगर शहर भाजपवर निशाणा साधला आहे. नगर-औरंगाबाद महामार्गावर असलेल्या नटराज हॉटेल येथे काल कोविड सेंटर सुरू करण्यात आले आहे. या कोविड सेंटरचे उदघाटन शनिवारी माजी मंत्री राधाकृष्ण विखे-पाटील व राष्ट्रीय स्वयंसेवक संघाचे प्रांत संघचालक नानासाहेब जाधव यांच्या हस्ते झाले. मात्र आता या कोविड सेंटरवरून शिवसेना-भाजप आमनेसामने आले आहेत. शिवसेनेचे उपजिल्हाप्रमुख गिरीश जाधव यांनी या कोविड सेंटरवरून भाजपवर सडकून टीका केली आहे. जाधव म्हणाले, 'नगर शहरात महापालिकेने लक्षावधी रुपये खर्च करून जम्बो कोविड सेंटर उभारले आहे. हॉटेल नटराजची जागा ताब्यात घेऊन तेथे सामाजिक संस्थांचे सहाय्य घेऊन मोठ्या सुविधा उभ्या केल्या. पण आता भाजपकडून सत्तेचा दुरुपयोग केला जात आहे. फक्त क्रेडिट घेण्यासाठी नटराज कोविड सेंटर एका राजकीय पक्षाने ताब्यात घेणे बेकायदेशीर असून हा प्रकार म्हणजे आयत्या बिळावर नागोबा असाच आहे. करोनाच्या काळात सामान्यांना परवडावे म्हणून महापालिकेने स्वखर्चाने हे कोविड सेंटर सुरू केले आहे. एक तर या इमारतीची घरपट्टी आणि पाणीपट्टी थकलेली आहे. ती कोटीच्या घरात आहे. या ठिकाणचे लाईटबिल थकलेले असून वीज वितरण कंपनीने या ठिकाणचे वीज कनेक्शन कट केले आहे. मग या इमारतीला वीज व पाणी आले कोठून? मनपाने जर ही इमारत ताब्यात घेऊन सुशोभीकरणासाठी मोठा खर्च केलेला असेल तर ही सुविधा आपण देत आहोत एवढे सांगण्यासाठी महापौर आणि शहर प्रमुखांनी हा प्रकार केला का?, असा सवालही जाधव यांनी उपस्थित केला आहे. दरम्यान, याबाबत महापौर बाबासाहेब वाकळे यांच्याशी संपर्क केला असता ते म्हणाले, 'कोणी काय आरोप करतय यापेक्षा चांगले काम करण्यास माझे प्राधान्य आहे. लोकांना सेवा देता यावी, यासाठी कोविड सेंटर सुरू करण्याचा उद्देश आहे. भाजपचे पदाधिकारी हे कोविड सेंटर चालविण्यासाठी लागणारा खर्च करणार आहेत ही चांगलीच गोष्ट आहे. त्यामुळे कोण काय आरोप करतय, याकडे आम्ही लक्ष देत नाही.'
