म. टा. प्रतिनिधी, नगर: हातामध्ये तलवार घेऊन फोटो काढून तो व्हायरल करणे एका तरुणाला चांगलेच महागात पडले आहे. या तरुणाच्या विरोधात पोलीस ठाण्यात गुन्हा दाखल करण्यात आला असून, त्याला काल रात्री पोलिसांनी ताब्यात घेतले आहे. योगेश शिवाजी चावरे (वय २२, रा. नजीक चिंचोली, ता. नेवासा ) असे या तरुणाचे नाव असून त्याला आज न्यायालयात हजर करण्यात येणार आहे. योगेशने काल तलवारीसह फोटो काढून ते सोशल मीडियावर व्हायरल केले होते. याबाबतची माहिती पोलिसांना मिळाली. त्यानंतर नेवासा पोलीस ठाण्याचे अधिकारी व कर्मचारी यांनी दोन पंचासह योगेशच्या घरावर छापा टाकला. यावेळी त्याच्याकडे आठ हजार रुपये किमतीच्या दोन तलवारी सापडल्या. अधिक चौकशी केली असता योगेश या तलवारी विनापरवाना व बेकायदेशीररित्या स्वतःजवळ बाळगत असल्याचे निदर्शनास आले. त्यामुळे पोलिसांनी दोन्ही तलवारी जप्त करत योगेश चावरे याला ताब्यात घेतले. या प्रकरणी नेवासा पोलीस ठाण्यात काल रात्री उशिरा गुन्हा दाखल करण्यात आला असून, पोलीस उपनिरीक्षक प्रदीप शेवाळे अधिक तपास करीत आहेत.
