लंडन: करोनाच्या संसर्गाला अटकाव करण्यासाठी काही देशांकडून लस विकसित करण्याचे प्रयत्न सुरू आहेत. काही लशींची तिसऱ्या टप्प्यातील चाचणीही सुरू झाली आहे. रशिया, चीनने आपल्या देशात विकसित झालेली लस आपात्कालीन परिस्थितीत वापरण्याची परवानगी दिली आहे. लशींशिवाय करोनाला अटकाव करता येऊ शकतो असा दावा जागतिक आरोग्य संघटनेच्या युरोप प्रमुखांनी केला आहे. जागतिक आरोग्य संघटनेचे युरोप विभागाचे प्रमुख हॅन्स क्लूग यांनी एका वृत्तवाहिनीशी बोलताना सांगितले की, करोनाच्या महासाथीवर विजय मिळवता येऊ शकतो. मात्र, हा विजय लशीमुळेच मिळेल असे नाही. युरोपमध्ये करोनाच्या संसर्गाला अटकाव करण्यासाठी स्थानिक पातळीवर लॉकडाउन करावे लागेल असेही त्यांनी म्हटले. करोनासोबत रहाण्याची तयारी करावी लागेल असेही त्यांनी सांगितले. करोनाची लाट आल्यानंतर पु्न्हा एकदा लॉकडाउन लागू शकतो का, असा प्रश्नही त्यांनी विचारण्यात आला. त्याला उत्तर देताना त्यांनी म्हटले की, दुसऱ्या लाटेच्या वेळी मोठ्या प्रमाणावर लॉकडाउन लागू होईल असे वाटत नाही. मात्र, स्थानिक पातळीवर कडक लॉकडाउनचे निर्बंध लागू होऊ शकतात, अशी शक्यताही त्यांनी वर्तवली. वाचा: एका महिन्यात करोना विषाणूचा प्रभाव नष्ट करोनाबाधितांमधून विषाणू नष्ट करण्यास किमान एक महिन्याचा कालावधी लागत असल्याचे इटलीच्या संशोधकांनी म्हटले आहे. करोनााबाधितांनी एका महिन्यात दुसऱ्यांदा चाचणी करणे आवश्यक असल्याचेही त्यांनी नमूद केले. पाच करोना निगेटिव्ह चाचणीपैकी एका चाचणीचा निकाल चुकीचा असल्याचे आढळले आहे. वाचा: वाचा: इटलीतील मॉडेना अॅण्ड रेजियो एमिलिया विद्यापीठाचे डॉ. फ्रान्सिस्को वेंतुरेली आणि त्यांच्या सहकाऱ्यांनी ११६२ रुग्णांचा अभ्यास केला. यामध्ये करोनाबाधितांची दुसऱ्यांदा चाचणी केल्यानंतर १५ दिवसांनंतर, तिसऱ्यांदा १४ दिवसानंतर आणि चौथ्यांदा नऊ दिवसानंतर चाचणी करण्यात आली. यामध्ये ज्यांची चाचणी निगेटिव्ह आली, त्यांची चाचणी पुन्हा एकदा पॉझिटिव्ह आली. जवळपास पाचपैकी एकाचा चाचणी अहवाल चुकीचा आल्याचे आढळले. या अभ्यासानुसार, ५० वर्षांपर्यंतच्या व्यक्तींना ३५ दिवस आणि ८० व त्याहून अधिक वयाच्या करोनाबाधितांची प्रकृती बरी होण्यास ३८ दिवस लागतात. दरम्यान, जागतिक आरोग्य संघटनेने मार्च ते जून या दरम्यान मिळालेल्या माहितीच्या आधारे जगातील आरोग्य व्यवस्थेबाबत चिंता व्यक्त केली आहे. अशी परिस्थिती कायम राहिल्यास ९० टक्के देशांमधील आरोग्य व्यवस्था उद्धवस्त होण्याची भीतीदेखील व्यक्त करण्यात आली आहे. करोनाच्या संसर्गामुळे अनेक नियमित आरोग्य तपासणी, आरोग्यविषयक असलेल्या तक्रारींचे निदान लांबणीवर पडले आहे. करोनाच्या महासाथीमुळे कर्करोगाच्या उपचारावर मोठा परिणाम झाला आहे.
