मॉस्को: करोनाच्या संसर्गाला अटकाव करण्यासाठी जगभरात विविध पातळीवर प्रयत्न सुरू आहेत. त्यात अनेक देशांमध्ये लस विकसित करण्याचे प्रयत्न सुरू असताना रशियाने चांगली बातमी दिली आहे. रशियाने ‘EpiVacCorona’ या करोना प्रतिबंधक लशीला मंजुरी दिली आहे. राष्ट्रपती व्लादिमीर पुतीन यांनी याबाबतची घोषणा केली. रशियाने विकसित केलेली ही दुसरी आहे. रशियाने 'स्पुटनिक व्ही' या करोनावरील लशीला ऑगस्टमध्ये मंजुरी दिली होती. त्यानंतर ही ‘EpiVacCorona’दुसरी लस आहे. ही लस सायबेरियातील वेक्टर इन्स्टिट्यूटने विकसित केली आहे. दोन आठवड्यांपूर्वी या लस चाचणीच्या परिणामांचा अभ्यास करण्यात आला होता. त्यानंतर या लशीला मंजुरी देण्यात आली. वायरोलॉजी अॅण्ड बायोटेक्नोलॉजी सेंटर नोवोसिबिरस्क वेक्टरने करोनावरील दुसऱ्या लशीची नोंदणी केली असल्याचे पुतीन यांनी म्हटले. ही लस सुरुवातीच्या टप्प्यात १०० जणांना देण्यात आली होती. त्याचे परिणाम सकारात्मक आले असल्याचेही त्यांनी सांगितले. वाचा: उपपंतप्रधानांनी घेतली लस मॉस्को टाइम्सने दिलेल्या वृत्तानुसार, रशियाचे उपपंतप्रधान ततयाना गोलिकोवा आणि ग्राहक संरक्षण देखरेख संस्थेचे प्रमुख अॅना पोपोव्हा यांनाही लस देण्यात आली आहे. या लशीच्या दोन महिन्यांपासून चाचणी सुरू आहेत. मात्र, या चाचण्यांचे निष्कर्ष, संशोधन वैज्ञानिकांनी अद्याप प्रकाशित केलेले नाहीत. या EpiVacCorona लसीच्या पुढील टप्प्यातील चाचणीसाठी देशभरातील ४० हजार स्वयंसेवकांची निवड करण्यात येणार आहे. वाचा: वाचा: डिसेंबरमध्ये तिसरी लस? डिसेंबर महिन्यात करोनावरील तिसऱ्या लशीलादेखील सरकारची परवानगी मिळेल असे गोलिकोवा यांनी सांगितले. EpiVacCoronaचे ६० हजार डोस तातडीने तयार करण्याचे नियोजन आहे. रशियाने 'स्पुटनिक व्ही' या करोनावरील लशीला ऑगस्टमध्ये मंजुरी दिली होती. त्यावर अमेरिकेसह पाश्चिमात्य देशांनी आक्षेप घेत संशय व्यक्त केला होता. जागतिक आरोग्य संघटनेनेही आपल्या मार्गदर्शक सूचनांनुसारे लस विकसित झाले नसल्याचे म्हटले. अखेर रशियाने माघार घेत 'स्पुटनिक व्ही' लशीची मोठ्या प्रमाणावर चाचणी घेण्याची तयारी दर्शवली. ही लस चाचणी आता ४० हजारजणांना देण्यात येणार असून याचे परिणाम जागतिक आरोग्य संघटनेकडेही पाठवण्यात येणार आहे. रशियाने 'स्पुटनिक व्ही' ही लस सर्वसामान्य नागरिकांसाठी उपलब्ध केली आहे. मात्र, अपुरा पुरवठा होत असल्यामुळे या लशीबाबत अनेक चर्चा सुरू होत्या.
