वॉशिंग्टन: अमेरिकेच्या राष्ट्राध्यक्षपदाच्या प्रत्यक्ष मतदानाला चार दिवस राहिले आहेत. त्यामुळे आता प्रचार शिगेला पोहचला आहे. प्रचाराच्या रणधुमाळीत दोन्ही उमेदवारांनी जोर लावला आहे. अमेरिकेत सध्या बायडन यांची 'सातारा टाइप' सभेची जोरदार चर्चा सुरू आहे. डेमोक्रॅटीक पक्षाचे उमेदवार जो बायडन फ्लोरिडा येथील सभेत भाषण करत असताना अचानक पाऊस आला. मात्र, बायडन यांनी आपले भाषण सुरूच ठेवले. वर्षभरापूर्वा सातारा येथील सभेत राष्ट्रवादी काँग्रेसचे अध्यक्ष शरद पवार यांनीदेखील पावसात सभा घेतली होती. त्यांच्या या सभेनंतर राज्यातील निवडणूक प्रचारावर मोठा प्रभाव टाकला होता. फ्लोरिडामधील सभेत भर पावसात सभेत भाषण करणाऱ्या ७७ वर्षांच्या बायडन यांनी अमेरिकन नागरिकांची मने जिंकली आहेत. सोशल मीडियावर याची जोरदार चर्चा सुरू आहे. अमेरिकेत सध्या पोस्टल आणि ई-मेलद्वारे मतदान सुरू आहे. तर, दुसरीकडे तीन नोव्हेंबर रोजी प्रत्यक्ष मतदान होणार आहे. यंदाची निवडणूक अटीतटीची होणार असल्याचा अंदाज वर्तवण्यात आला आहे. काही सर्वेक्षणात बायडन आघाडीवर असल्याचे सांगत येत आहे. मात्र, बायडन आणि ट्रम्प या दोन्ही उमेदवारांनी जोर लावला आहे. या निवडणुकीत फ्लोरिडा हे महत्त्वाचे राज्य ठरणार आहे. त्यामुळे दोन्ही उमेदवारांनी जोर लावला आहे. वाचा: बायडन सभेत भाषण करत असताना पाऊस कोसळण्यास सुरुवात झाली. मात्र, बायडन यांनी सभेत भाषण सुरूच ठेवले. त्यांची ही सभा 'रॅली ड्राइव्ह इन' होती. या सभेला हजर असणारे कारमध्ये बसून भाषण ऐकत होते. करोना संसर्गाच्या पार्श्वभूमीवर ही खबरदारी घेण्यात आली होती. हा सभेचा व्हिडिओ आणि फोटो सध्या सोशल मीडियावर मोठ्या प्रमाणावर व्हायरल होत आहे. काही नेटकऱ्यांनी अमेरिकेचे माजी राष्ट्राध्यक्ष बराक ओबामा यांच्या १२ वर्षांपूर्वीच्या भाषणाची आठवण झाली. त्यांनी त्याची तुलना करताना बायडन त्या विजयाची पुनरावृत्ती करतील असा विश्वासही व्यक्त केला आहे. ओबामा हे राष्ट्राध्यक्ष असताना बायडन उपराष्ट्रपती होते. वाचा: वाचा: काही नेटकऱ्यांनी या सभेच्या निमित्ताने ट्रम्प यांच्यावर निशाणा साधला आहे. ट्रम्प यांना पावसात केस ओले होण्याची भीती वाटत असल्याचे नेटकऱ्यांनी म्हटले. काही दिवसांपूर्वीदेखील डेमोक्रॅटीक पक्षाच्या उमेदवार कमला हॅरीस सभेला संबोधित करत असताना अचानक पाऊस आला. त्यावेळी त्या पावसात थिरकल्या होत्या. त्यांच्या या सभेचा व्हिडिओ व्हायरल झाला होता. ही सभादेखील फ्लोरिडामध्ये झाली होती.
