मुंबई : करोना रुग्णांचा वाढता आकडा आणि जागतिक बाजारातील नकारात्मक संकेतांनी गुरुवारी भारतीय शेअर निर्देशांकांची पुरती दाणादाण उडवली. आणि निफ्टीत झालेल्या पडझडीने गुंतवणूकदारांचे ३.३० लाख कोटींचे नुकसान झाले आहे.आजच्या सत्राबाबत विश्लेषक गुंतवणूकदारांना सावध ट्रेड करण्याचा सल्ला देत आहेत. चौफेर विक्रीने गुरुवारी सेन्सेक्स १०६६ अंकांनी कोसळला आणि ३९७२८ अंकावर बंद झाला. राष्ट्रीय शेअर बाजाराचा निफ्टी २९० अंकांनी आपटला आणि तो ११६८० अंकावर बंद झाला. रिलायन्स आणि आयटीसीच्या शेअरमध्ये आज जोरदार नफावसुली झाली. या पडझडीत गुंतवणूकदारांचे ३.३० लाख कोटीचे नुकसान झाले. मुंबई शेअर बाजारातील नोंदणीकृत कंपन्यांचे बाजार भांडवल १५७.२२ लाख कोटी इतके खाली आले. निफ्टी ११७०० च्या पातळीवर राहण्याची शक्यता आहे. जागतिक बाजारातील नकारात्मक संकेतांचा विचार करता आज देखील भांडवली बाजारात विक्रीचा बोलबाला राहील, असा अंदाज जाणकारांनी व्यक्त केला आहे. निफ्टी ११५५३ ते ११४८८ च्या दरम्यान राहील. जर ही पातळी देखील तोडली तर मात्र पुढील आठवड्यात बाजारात मोठी घसरण अपेक्षित आहे, असे मत एक्सिस सिक्युरिटीजचे वायदे विभाग प्रमुख राजेश पालव्हिया यांनी व्यक्त केले. आजच्या सत्रात पेट्रोनेट एलएनजी, पॅरामाऊंट कम्यु, प्रीकोल, टीव्ही टूडे यासारख्या शेअरमध्ये तेजी राहण्याचा अंदाज विश्लेषकांनी व्यक्त केला आहे. अमेरिकेत बेरोजगारीमध्ये वाढ झाली आहे. त्याचा परिणाम तेथील भांडवली बजावर जाणवला. गुरुवारी डाऊजोन्स २४३ अंकांनी कोसळला. नॅसडॅक देखील १६६ अंकांनी घसरला. अमेरिकेत निवडणुकीचे पडघम वाजत असले तरी दुसऱ्या बाजूला करोनाने अर्थव्यवस्थेला जेरीस आणले आहे. अमेरिकन अर्थव्यवस्था सावरण्यासाठी हाऊस ऑफ रिप्रेझेंटेटिव्हकडून दुसरे आर्थिक पॅकेज जाहीर करण्याचे संकेत यूएस ट्रेजरी सेक्रेटरी स्टीव्ह म्युनिच यांनी दिले. अमेरिका आणि चीनमधील व्यापारी युद्ध पुन्हा एकदा भडकण्याची शक्यता आहे. चीनमधील एका बड्या उद्योगसमूहाला काळया यादीत टाकण्याची शिफारस यूएस स्टेट डिपार्टमेंटने ट्रम्प प्रशासनाकडे केली आहे.
