मुंबई : पेट्रोलियम कंपन्यांनी आज शनिवारी सलग ३६ व्या दिवशी इंधन दरात कोणताही बदल केला नाही. आज मुंबईत पेट्रोल ८७.७४ रुपये आणि डिझेल ७६.८६ रुपये प्रती लीटर कायम आहे. दिल्लीत आजचा पेट्रोलचा भाव ८१.०६ रुपये असून ७०.४६ रुपयांवर कायम आहे. चेन्नईत पेट्रोल ८४.१४ रुपये असून डिझेल ७५.९५ रुपये आहे. कोलकात्यात पेट्रोल ८२.५९ रुपये आहे. डिझेलचा भाव ७३.९९ रुपये प्रती लीटर झाले आहे. जागतिक बाजारात खनिज तेलाच्या किमतीत घट झाली असली तरी महिनाभरापासून देशातील इंधन दर 'जैसे थे'च आहेत. जागतिक बाजारात कच्च्या तेलाचे भाव पाच महिन्यांच्या नीचांकी स्तरावर आहेत. मात्र असे असूनही भारतीय ग्राहकांना चढ्या दराने इंधन खरेदी करावी लागत आहे. जागतिक बाजारात आज कच्च्या तेलाच्या किमतीत पुन्हा एकदा घसरण झाली. आज सिंगापूरमध्ये क्रूड ऑइलचा भाव १.६५ डॉलरने घसरून प्रती बॅरल ३७.१४ डॉलर झाला आहे. ब्रेंट क्रूडच्या भावात १.४८ डॉलरची घसरण झाली आणि तेलाचा भाव प्रती बॅरल ३९.४५ डॉलर झाला. अमेरिकेत मतमोजणी सुरू असून अद्यापही निकाल जाहीर झाले नाहीत. मतमोजणीत गैरप्रकार होत असल्याचा आरोप डोनाल्ड ट्रम्प यांच्याकडून सातत्याने होत असून त्यांनी कोर्टात जाण्याचा निर्णय घेतला होता.मात्र, मिशिगन आणि जॉर्जिया कोर्टाने ट्रम्प यांना धक्का दिला असून त्यांच्या याचिका फेटाळल्या आहेत. ट्रम्प यांच्या प्रचार मोहीम टीमकडून जॉर्जियातील कोर्टात याचिका दाखल करण्यात आली होती. जॉर्जियामध्ये उशिराने आलेल्या ५३ मतपत्रिकांचा समावेश हा वेळेत आलेल्या मतपत्रिकांमध्ये करण्यात आल्याचा दावा करण्यात आला. त्याशिवाय मतमोजणीत गैरप्रकार होत असल्याचा दावा करण्यात आला. मात्र, कोर्टाने ही याचिका फेटाळून लावली आहे. याचिकेतील दाव्याबाबत कोणताही पुरावा नसल्याचे सांगत जॉर्जिया कोर्टाने ही याचिका फेटाळून लावली. तर, मिशिगनमध्येही ट्रम्प यांना धक्का बसला. ट्रम्प यांच्यावतीने दाखल करण्यात आलेली याचिका फेटाळण्यात आली. आरोपात कोणतेही तथ्य दिसत नसल्याचे कोर्टाने म्हटले.
