मुंबई : समभाग विक्रीला सुरुवातीला अल्प प्रतिसाद मिळून देखील शेवटच्या दिवशी पूर्ण सबस्क्राईब झालेल्या ग्लँड फार्माच्या शेअरची आज शुक्रवारी झाली. (Gland Pharma had a Strong Listing Today) आयपीओसाठी निश्चित केलेल्या किमतीच्या तुलनेत आज शेअरने तब्बल १४ टक्के अधिक दराने नोंद केली. या आयपीओतील भाग्यवान गुंतवणूकदारांना प्रती शेअर २०१ रुपयांचा फायदा झाला. कंपनीने आयपीओसाठी १,४९० ते १,५०० रुपयांचा किंमतपट्टा निर्धारित केला होता. मात्र प्रत्यक्षात कंपनीचा शेअर १७१० रुपयांवर नोंदवला गेला. विशेष म्हणजे गेल्या आठवड्या ग्रे मार्केटमध्ये ग्लँड फार्माचा शेअर १४० ते १५० रुपये जादा दराने मिळत होता. औषध निर्माण क्षेत्रातील या कंपनीचा भारतात सात उत्पादन प्रकल्प आहेत. कंपनीचे प्रवर्तक बड्या चिनी कंपन्यांचे मालक आहेत. याशिवाय ३० टक्के कच्चा माल चीनमधून आयात केला जातो. ग्लँड फार्माने आयपीओतून एकूण ६४७९ कोटी रुपये उभारले आहेत. कंपनीची प्रवर्तक चिनी कंपनी आहे. त्यामुळे गुंतवणूकदारांमध्ये संभ्रमाचे वातावरण होते. गलवान खोऱ्यात भारतीय लष्करासोबत केलेल्या दगाफटक्यानंतर चीनवर चहुबाजूने टीका होत होती. केंद्र सरकारने देखील आत्मनिर्भर भारत अंतर्गत स्थानिक उत्पादनाला चालना देण्याचे धोरण अवलंबले होते. त्यामुळे सुरुवातीचे दोन दिवस ग्लँड फार्माच्या शेअर विक्रीला संथ प्रतिसाद दिला होता. ग्लँड फार्माने आज जोरदार नोंदणी केली. इश्यू प्राईस पेक्षा प्रत्यक्ष कंपनीचा शेअर १७१० रुपयांवर नोंदवला गेला. अमेरिकन अन्न आणि औषध प्रशासनाकडून कंपनीला अद्याप एकही नकारात्मक शेरा मिळालेला नाही. एएनडीएकडे सादर केलेल्या २६७ औषधांच्या प्रस्तावांपैकी २१५ औषधांना मान्यता मिळाली आहे. कंपनीचे भवितव्य उज्ज्वल आहे , असे मोतीलाल ओसवाल फायनान्शिअल सर्व्हिसेसचे विश्लेषक हेमांग जानी यांनी सांगितले. वाचा : आयपीओला मिळाला होता संथ प्रतिसाद पहिल्याच दिवशी ग्लँड फार्माच्या आयपीओमध्ये क्वालिफाइड इन्स्टिट्यूशनल बायर्सचा हिस्सा ८६ टक्के राहिला असून, किरकोळ गुंतवणूकदारांनी ७.७ टक्के गुंतवणूक केली होती. पहिल्या दिवशी एकूण आयपीओच्या केवळ ४.५ टक्केच समभागांची खरेदी झाली होती. कंपनीने ३.२ कोटी समभाग जारी केले आहेत. मात्र, गुंतवणूकदारांनी पहिल्या दिवशी केवळ १२.६ लाख समभागांच्या खरेदीसाठी रस दाखवला होता. मात्र शेवटच्या दिवशी आयपीओ २.०५ पटीने पूर्ण सबस्क्राईब झाला आहे. तब्बल ६ कोटी १९ लाख शेअरसाठी गुंतवणूकदारांनी अर्ज सादर केले आहेत. आयपीओमध्ये कंपनी ३.०२ कोटी शेअरचे वाटप करणार आहे.
