मुंबई : पेट्रोलियम कंपन्यांनीं आज सोमवारी पेट्रोल आणि डिझेल दरात कोणताही बदल केला नाही. सलग २१ व्या दिवशी इंधन दर स्थिर आहेत. गेल्या महिन्यात दरवाढीने काही शहरांत पेट्रोल ९० रुपयांवर गेले होते. त्यानंतर देशभरातून केंद्र सरकार विरोधात तीव्र नाराजी व्यक्त करण्यात आली. तेव्हापासून इंधन दर स्थिर आहेत. आज मुंबईत पेट्रोलचा भाव एक लिटरसाठी ९०.३४ रुपये आहे. तर एक लीटर ८०.५१ रुपये आहे. दिल्लीत आजचा पेट्रोलचा भाव ८३.७१ रुपये झाला आहे. डिझेलचा भाव ७३.८७ रुपये आहे. त्याशिवाय चेन्नईत देखील आज पेट्रोलचा भाव ८६.५१ रुपये असून डिझेल ७७.४४ रुपये आहे. कोलकात्यात एक लिटर पेट्रोलचा भाव ८५.१९ रुपये असून डिझेल ७७.४४ रुपये आहे. जागतिक कमॉडिटी बाजारात क्रूडचा भाव प्रती बॅरल ५० डॉलरच्या आसपास आहे. आज सिंगापूरमध्ये कच्च्या तेलाच्या भावात किरकोळ घसरण झाली. क्रूडचा भाव ०.८ टक्क्यांनी घसरून ४७.८५ डॉलर प्रती बॅरल झाला. तर ब्रेंट क्रूडचा भाव प्रती बॅरल ०.३९ डॉलरने कमी झाला आणि तो ५०.९० डॉलर प्रती बॅरल झाला. अमेरिकेत करोना संकटापासून सावरण्यासाठी ९०० अब्ज डॉलरचे आर्थिक पॅकेज मंजूर करण्यात आले आहे. मात्र करोना रुग्णांची संख्या सातत्याने वाढत आहे. करोनाने युरोपात देखील पुन्हा डोकं वर काढले आहे. करोनाबाधितांची संख्या वाढत असल्याने ब्रिटनसह काही देशांनी लॉकडाउनचा पर्याय निवडला आहे. परिणामी इंधन मागणीवर मोठा परिणाम झाला आहे. अमेरिकन पेट्रोलियम इन्स्टिट्यूटने मंगळवारी तेल साठ्याची ताजी आकडेवारी जाहीर केली. ज्यात १८ डिसेंबरच्या आठवड्यात तेलाचा २.७० दशलक्ष बॅरल साठा आहे. त्याआधीच्या आठवड्यात तो १.९७ दशलक्ष बॅरल इतका साठा होता. दरम्यान, ब्रिटनमध्ये नव्या करोना व्हायरसने एकच खळबळ उडाली आहे. यामुळे अनेक देशांनी ब्रिटनला जोडणारी विमान सेवा खंडीत केली आहे. तेथे पुन्हा टाळेबंदी जाहीर करण्यात आहे. स्पेन, जर्मनी, इटली हे देश पुन्हा सतर्क झाले आहेत. या घडामोडी कच्च्या तेलाच्या बाजारपेठेसाठी मात्र नकारात्मक ठरत आहे. पुन्हा लॉकडाउनमुळे तेलाची मागणी घसरण्याची शक्यता आहे.
