लंडन: ब्रिटनमध्ये करोनाच्या नव्या स्ट्रेनचा संसर्ग मोठ्या प्रमाणावर फैलावत असल्याचे समोर आले आहे. ब्रिटनमध्ये करोनाबाधितांच्या संख्येत मोठी वाढ होत असून आरोग्य व्यवस्थेवर ताण पडू लागला आहे. अनेक रुग्णालयांमध्येही जागा अपुरी पडू लागली आहे. बाधितांच्या वाढत्या संख्येमुळे ऑक्सफर्ड-एस्ट्राजेनकाच्या लशीला ब्रिटनमध्ये येत्या काही दिवसांमध्ये मंजुरी मिळण्याची शक्यता वर्तवण्यात येत आहे. ऑक्सफर्ड-एस्ट्राजेनकाने विकसित केलेल्या लशीमुळे नव्या स्ट्रेनचा संसर्ग रोखण्यात यश मिळेल असा विश्वास काही अधिकाऱ्यांनी व्यक्त केला. ब्रिटनमध्ये नवा स्ट्रेन आढळल्यानंतर संसर्ग नियंत्रणाबाहेर गेला आहे. रुग्णालयात नव्या रुग्णांसाठी जागा अपुरी पडत असून तंबूमध्ये रुग्णांवर उपचार करावे लागत आहे. ब्रिटनने याआधीच १० कोटी लशीची मागणी नोंदवली आहे. ऑक्सफर्डची लस स्वस्त आहे. ऑक्सफर्डची लस ही नव्या स्ट्रेनवरही १०० टक्के परिणामकारक ठरणार असल्याचा दावा एस्ट्राजेनकाने केला आहे. वाचा: आतापर्यंत सहा लाखजणांना लस ब्रिटनमध्ये आतापर्यंत सहा लाखजणांना फायजरची लस देण्यात आली आहे. ब्रिटनमध्ये काही आठवड्यांपूर्वी फायजरच्या लशीला मंजुरी देण्यात आली होती. त्यानंतर लसीकरण मोहीम सुरू झाली. फायजरची लस दिल्यानंतर काहीजणांना दुष्परिणामही जाणवले. वाचा: ‘निर्बंध कमी होतील’ ऑक्स्फर्ड विद्यापीठ आणि एस्ट्राजेनेकामार्फत विकसित करण्यात येणाऱ्या लशीला नियामक मंजुरी मिळाल्यास करोनाबाबतचे निर्बंध कमी होतील, असा विश्वास ब्रिटनचे मंत्री मायकेल गोव्ह यांनी सोमवारी व्यक्त केला आहे. स्वतंत्र नियामक यंत्रणेमार्फत लशीचे मूल्यमापन होईल. मात्र, त्यास मंजुरी मिळाल्यानंतर लशीच्या उपलब्धतेत मोठी वाढ होईल. ब्रिटनने यापूर्वीच फायझर आणि बायोएनटेकने विकसित केलेल्या लशीला परवानगी दिली आहे. वाचा: स्पेनसह आठ देशांमध्ये लशीला उशीर युरोपीयन महासंघाच्या देशांमध्येही लसीकरण कार्यक्रम सुरू झाला आहे. मात्र, फायजरमुळे स्पेनसह आठ देशांना लस उशिराने उपलब्ध होणार असल्याची माहिती स्पेनचे आरोग्य मंत्री सेल्वाडोर इला यांनी दिली. मात्र, लवकरच हा लस उपलब्ध होणार असल्याचेही त्यांनी सांगितले. ‘लशींचा डोस जहाजात लादण्यात येत असलेल्या अडचणींमुळे आठ देशांना लशीचा डोस पुरवठा करण्यास विलंब होत असल्याचे कारण ‘फायझर’ने दिले आहे; तसेच ही अडचण दूर झाली असून, मंगळवारपर्यंत स्पेनला लशीचा पुरवठा होईल, असे कळविण्यात आले आहे,’ असे आरोग्यमंत्र्यांनी सांगितले. मात्र, स्पेन वगळता इतर देशांची नावे त्यांनी सांगितली नाही.
