जमशेदपूर: झारखंडमधील दुमकामध्ये सामूहिक बलात्काराची घटना ताजी असतानाच, आणखी एक संतापजनक घटना घडली आहे. सरायकेला खरसावा जिल्ह्यात चौका पोलीस ठाण्याच्या हद्दीतील एका गावात विधवा महिलेला निर्वस्त्र करून गावाबाहेर काढण्यात आले आहे. पोलिसांनी या प्रकरणात अद्याप एकाच आरोपीला अटक केली आहे. चौका पोलीस ठाण्याच्या हद्दीतील घेराबारा गावात सोमवारी रात्री ही घटना घडली. एका विधवा महिलेला गावातील १० जणांनी ग्रामस्थांसमोरच बेदम केली. तिला निर्वस्त्र केले. त्यानंतर तिला गावातून बाहेर काढले. पीडितेने आपल्या कुटुंबीयांच्या मदतीने पोलीस ठाण्यात जाऊन आरोपींविरोधात तक्रार दाखल केली. या प्रकरणी एका आरोपीला अटक करण्यात आली आहे. उर्वरित आरोपींना अटक करण्यासाठी छापे मारले जात आहेत, अशी माहिती पोलिसांनी दिली. महिलेच्या तक्रारीनुसार, सुरुवातीला गावातील तीन महिलांनी तिला घराबाहेर फरफटत आणले. त्यानंतर दहा जणांच्या ताब्यात दिले. त्यांनी गंभीर आरोप केले. त्यानंतर तिला बेदम मारहाण केली. तिच्या अंगावरचे कपडे फाडले. तसेच गाव सोडण्यास सांगितले. ती अंगणवाडी कर्मचारी आहे. तिच्या जागी मर्जीतील एखाद्या महिलेची नियुक्ती करायची असल्याने त्यांनी मारहाण केली. महिला आपल्या १४ वर्षांच्या मुलासोबत गावात राहते. मंगळवारी रात्री ती भीतीने आपल्या आईच्या घरी गेली आहे. त्यानंतर कुटुंबीयांच्या मदतीने तिने पोलिसांत तक्रार दाखल केली आहे. पोलिसांनी महिलेला प्राथमिक उपचारांसाठी एमजीएम रुग्णालयात दाखल केले. त्यानंतर तिचे कुटुंबीय तिला रांचीमधील संतविता रुग्णालयात घेऊन गेले.
