म. टा. प्रतिनिधी, मुंबई: भाजपला कंटाळून या पक्षातील आणखी काही नेते काँग्रेसमध्ये लवकरच प्रवेश करणार आहेत, अशी माहिती काँग्रेसचे प्रदेशाध्यक्ष तथा महसूलमंत्री यांनी मंगळवारी येथे दिली. अहमदनगर जिल्ह्यातील ज्येष्ठ नेत्यांचा काँग्रेसमध्ये प्रवेश झाल्यानंतर ते बोलत होते. पक्षात प्रवेश करणाऱ्यांची संख्या दिवसेंदिवस वाढत असून मंगळवारी अहमदनगर जिल्ह्यातील ज्येष्ठ नेत्यांनी शेकडो समर्थकांसह काँग्रेस पक्षात प्रवेश केला. संघाच्या मुशीत घडलेल्या भाजपचे विचार आणि त्यांचे केंद्रातील सरकार देशहिताचे नसून समाजात तेढ निर्माण करणारे आहे असा गंभीर आरोप करून, पुन्हा एकदा राष्ट्रनिर्माणासाठी मोठे कार्य करावे लागणार आहे, असे थोरात यांचे म्हणणे आहे. अहमदनगर जिल्ह्यातील अकोल्याचे ज्येष्ठ नेते, अभिनव शिक्षण संस्थेचे संस्थापक अध्यक्ष मधुकरराव नवले, अगस्ती साखर कारखान्याचे संचालक मिनानाथ पांडे, बुवासाहेब नवले पतसंस्थेचे उपाध्यक्ष रमेश जगताप, राष्ट्रवादी युवक काँग्रेसचे सरचिटणीस मदन पथवे, सावरगावपाठचे सरपंच रमेश पवार, समशेरफट गावचे सरपंच भास्करराव दराडे, देवगण गावचे एकनाथ सहाणे यांनी बाळासाहेब थोरात यांच्या उपस्थितीत गांधी भवन येथे काँग्रेस पक्षात प्रवेश केला.
