सोनीपत : दिल्ली हरयाणाच्या सिंघु सीमेवर कृषी कायद्याविरोधात शेतकऱ्यांचं आंदोलन सुरू आहे. या आंदोलनकारी शेतकऱ्यांची कोविड चाचणी करण्याचे आदेश सोनीपतचे श्यामलाल पुनिया यांनी दिलेत. सीमेवर आंदोलनात ठाण मांडून बसलेल्या शेतकऱ्यांपैंकी अंगात ताप असलेल्या शेतकऱ्यांची एक यादी तयार करण्याचे निर्देश पुनिया यांनी आरोग्य विभागाच्या अधिकाऱ्यांना दिले आहेत. अशा शेतकऱ्यांची मोफत कोविड चाचणी केली जाणार आहे. करोना संक्रमित आढळल्यास अशा शेतकऱ्यांना मोफत सोई-सुविधा आणि उपचार पुरवले जातील. करोना काळात आंदोलनासाठी मोठ्या संख्येत शेतकरी एकत्र जमले आहेत. त्यामुळे प्रशासनाच्या चिंतेतही भर पडलीय. अशा वेळी शेतकऱ्यांच्या आरोग्याची चाचपणी करणं अत्यंत आवश्यक ठरतंय. पुनिया यांनी बुधवारी परिस्थितीची समीक्षा केल्यानंतर संबंधित अधिकाऱ्यांना हे आदेश दिले आहेत. आंदोलक शेतकऱ्यांना कोविड चाचणीसाठी तयार करणं हेदेखील प्रशासनासमोर एक मोठं आव्हान आहे. आंदोलनस्थळी शेतकऱ्यांना नियमितपणे मास्क उपलब्ध करून देण्याचे आदेश देतानाच, मास्कचा वापर शेतकऱ्यांनी करावा, असं आवाहन अधिकाऱ्यांनी केलंय. वाचा : वाचा : सामाजिक संस्थांचीही मदत आंदोलनस्थळी एकत्र जमलेल्या महिलांनाही विशेष सुरक्षा तसेच सुविधा पुरवण्याचेही निर्देश देण्यात आले आहेत. महिला आणि बाल विकास विभागाची एक टीम गठीत करण्याचे आदेशही देण्यात आले आहे. 'खालसा एड' या संस्थेनंही आंदोलनकर्त्या महिलांना मोफत सॅनिटरी नॅपकीन्सचंही वाटप करण्यात आलंय तसंच संस्थेनं पोर्टेबल वॉशरुम्सचीही सुविधा महिला आणि पुरुषांसाठी उपलब्ध करून दिलीय. पंजाब, हरयाणा यांसहीत देशातील अनेक राज्यांत दिल्लीकडे लाखो शेतकऱ्यांनी कूच केलीय. काही शेतकऱ्यांनी बुराडीतील निरंकारी समागम मैदान 'खुलं तुरुंग' असल्याचं सांगत सिंघु सीमेवरच ठाण मांडलंय. शेतकऱ्यांच्या समर्थनार्थ अनेक संस्था, संघटना तसंच सेलिब्रिटी आंदोलनात सहभाग घेत आहेत. त्यामुळे आंदोलनकर्त्यांची संख्या दिवसेंदिवस वाढताना दिसत आहे. वाचा : वाचा :
