मेलबर्न, : अजिंक्य रहाणेच्या नेतृत्वाखाली भारतीय संघाने दुसऱ्या कसोटी सामन्यात ऐतिहासिक विजय मिळवला. पण तिसऱ्या सामन्यात भारतीय संघात काही महत्वाचे बदल होऊ शकतात, असे संकेत मिळत आहेत. भापताने दुसरा सामना जिंकला असला तरी तिसरा सामना हा महत्वाचा ठरणार आहे. कारण हा सामना भारताने जिंकला तर ते मालिका गमावणार नाहीत. त्यामुळे हा सामना दोन्ही संघांसाठी महत्वाचा असेल. त्यासाठी भारतीय संघात तिसऱ्या सामन्यासाठी महत्वाचे बदल होऊ शकतात. तिसऱ्या सामन्यासाठी भारतीय संघातून दोन खेळाडूंना डच्चू मिळू शकतो, असे वाटत आहे. तिसऱ्या सामन्यासाठी सलामीवीर मयांक अगरवाल आणि हनुमा विहारी या खेळाडूंना संघाबाहेर ठेवले जाऊ शकते. त्याचबरोबर संघात रोहित शर्मा आणि लोकेश राहुल यांना स्थान देण्यात येऊ शकते. त्याचबरोबर एक महत्वाचा बदल भारतीय संघात होऊ शकतो. भारताचा वेगवान गोलंदाज उमेश यादव हा दुसऱ्या सामन्यात दुखापतग्रस्त झाला आहे. त्यामुळे तो तिसऱ्या सामन्यात खेळणार की नाही, याबाबत साशंकता आहे. त्याचबरोबर मोहम्मद शमीही दुखापतीमुळे या दौऱ्यात खेळू शकणार नाही. त्यामुळे तिसऱ्या सामन्यात जर उमेश खेळू शकणार नसेल, तर त्याच्या जागी मराठमोळा शार्दुल ठाकूर किंवा नवदीप सैनी या दोन युवा वेगवान गोलंदाजांना संधी मिळू शकते. त्यामुळे तिसऱ्या सामन्यात नेमके कोणते बदल होतात, याची उत्सुकता सर्वांनाच असेल. मयांकला ऑस्ट्रेलियाच्या दौऱ्यावर एकदिवसीय संघातही स्थान देण्यात आले होते. पण या मालिकेतही त्याला चांगली कामगिरी करता आली नव्हती. त्याचबरोबर कसोटी मालिकेतही तो सातत्याने अपयशी ठरलेला पाहायला मिळाले. आतापर्यंतच्या दोन कसोटी सामन्यांमध्ये मयांकला फक्त ३१ धावा करता आल्या आहेत. पहिल्या कसोटी सामन्यात मयांकला १७ आणि ९ अशा धावा करता आल्या होत्या. त्याचबरोबर दुसऱ्या कसोटी सामन्यातही मयांक अपयशी ठरला आणि त्याने ० आणि ५ अशा धावा केल्या. त्याचबरोबर विहारीदेखील दोन्ही सामन्यांमध्ये चांगली कामगिरी करू शकलेला नाही. त्यामुळे या दोघांना तिसऱ्या सामन्यात डच्चू मिळू शकतो, असे संकेत मिळत आहेत.
