वाराणसी: जिल्ह्यातील शाहगंजमध्ये आयटीआयच्या दोन विद्यार्थ्यांनी शनिवारी एका सात वर्षीय मुलाचं करून केली. हत्येनंतर चोरी केलेल्या मोबाइलवरून फोन करून मुलाच्या वडिलांकडे खंडणी मागितली. पोलिसांनी मोबाइल नंबरवरून आरोपींचा ठावठिकाणा शोधला. सुलतानपूर येथील शिवम श्रीवास्तव आणि बिहारच्या मोतिहारी येथील आकाशला ताब्यात घेऊन त्यांची कसून चौकशी केली. त्यानंतर दोघांनी गुन्ह्याची कबुली दिली. त्यांनी माहिती दिल्यानंतर घरापासून १२ किलोमीटरवर असलेल्या आयटीआय विद्यालयाच्या जवळ असलेल्या पाण्याच्या टाकीजवळ मुलाचा मृतदेह सापडला. आरोपींपैकी एक जण हा मुलाची शिकवणी घेत होता. अभिषेक असं मुलाचं नाव आहे. तो शाहगंज पोलीस ठाण्याच्या हद्दीत असलेल्या अयोध्या रोडवरील आपल्या घरातून शिकवणीसाठी जवळच्याच यादव कॉलनीत खासगी क्लासच्या शिक्षकाच्या घरी गेला होता. दुपारी १२ वाजले तरी मुलगा परतला नाही. त्यामुळे त्याचे वडील दीपचंद हे शिक्षकाच्या घरी गेले. त्यावेळी अभिषेक हा शिकवणीसाठी आला नाही, असे शिक्षकाने सांगितले. दुपारी ३ वाजताच्या सुमारास दीपचंद यांच्या मोबाइलवर एका अनोळखी क्रमांकावरून फोन आला. अभिषेकचं अपहरण केलं आहे, असं सांगितलं. तसंच सात लाख रुपये खंडणी मागितली. दीपचंद शहागंज पोलीस ठाण्यात गेले. त्यांनी तक्रार नोंदवली. तपासासाठी पथकाची नेमणूक केली. अटक केलेल्या दोन्ही आरोपींच्या चौकशीतून मिळालेल्या माहितीच्या आधारे पोलिसांनी पाण्याच्या टाकीजवळून मुलाचा मृतदेह ताब्यात घेतला.
