बेंगळुरू: कर्नाटकच्या शिमोगा जिल्ह्यातील एका दगडखाणीत झालेल्या शक्तिशाली स्फोटात ८ जण ठार झाले असून काही जण जखमी झाले आहेत. स्फोटके वाहून नेणाऱ्या ट्रकचे तुकडे-तुकडे झाले आहेत. या घटनेची माहिती मिळताच बॉम्बनाशक पथक घटनास्थळी संपूर्ण परिसर सील करण्यात आला आहे. हुनासोंडी येथील दगडखाणीत काल रात्री साडेदहाच्या सुमारास हा स्फोट झाला. हा स्फोट इतका मोठा होता की परिसरातील इमारतींना तडे गेले. घराच्या काचा तुटल्या. शेजारच्या चिकमंगळूर जिल्ह्यातही ह्याचे हादरे जाणवले. भूकंप किंवा बॉम्बस्फोट झाल्याची अफवा उडाल्यानं लोक घाबरून गेले. अनेकांनी घरं सोडून मोकळ्या मैदानात धाव घेतली. खाणीतील दगड फोडण्यासाठी वापरल्या जाणाऱ्या स्फोटकांमुळं हा स्फोट झाला. मृतांमध्ये ट्रकमधून स्फोटके वाहून नेणाऱ्या कामगारांचा समावेश आहे. जिलेटिनच्या काही कांड्या अद्यापही तिथं असल्यानं आणखीही काही स्फोट होण्याची शक्यता नाकारता येत नाही, अशी माहिती पोलिसांनी दिली आहे.
