गाबारोनी: सोने, चांदी, हिऱ्याच्या खाणीसाठी आफ्रिका खंड प्रसिद्ध आहे. या खंडातील विविध देशातील खाणीतून मोठ्या किंमतीच्या हिरे, सोने आढळत असतात. कॅनडातील एका प्रसिद्ध खाण कंपनीला आफ्रिकन देश बोत्सवानातील एका खाणीमधून ३७८ कॅरेटचा हिरा आढळून आला आहे. हा हिरा १५ जानेवारी २०२१ रोजी सापडला होता. बोत्सवानातील दक्षिण लोबेच्या कारोवे खाणीतून आढळलेला २०० कॅरेटवरील हा ५५ वा हिरा आहे. या खाणीत हिऱ्याचा शोध घेण्याचे काम २०१२ मध्ये सुरू करण्यात आले होते. या खाणीत कॅनडाची कंपनी लुकारा डायमंड संचलित करत आहे. वाचा: या कंपनीने याबाबत सांगितले की, या वर्षी ३०० हून अधिक कॅरेट असलेला हा दुसरा हिरा आहे. याआधीदेखील ३०० कॅरेटचा हिरा सापडला. यावर्षीच्या सुरुवातीलाच ३०० कॅरेटचा हिरा सापडणे हे आमच्यासाठी चांगले संकेत असल्याचे कंपनीने म्हटले. ३७८ कॅरेटचा हा हिरा असाधारण आणि उच्च श्रेणीतील चमकदार हिरा आहे. अत्याधिक किंमत असणाऱ्या रत्नांमध्ये याचा समावेश होतो. हिऱ्याची आहे इतकी किंमत हिऱ्याबाबत जाणकार असणाऱ्यांनी सांगितले की, या ३७८ कॅरेटच्या टॉप व्हाइट डायमंडची किंमत ११० कोटी रुपये आहे. या हिऱ्याची विक्री करताना याची किंमत अधिक असू शकते. कारोवे खाण ही बोत्सवानामधील हिऱ्याच्या प्रमुख खाणीपैकी एक समजली जाते.
