मेरठ: उत्तर प्रदेशच्या जिल्ह्यात लग्नाच्या आदल्या दिवशीच भावाने आपल्या बहिणीची गोळ्या घालून केली. या घटनेमागील कारण उघड झाल्यानंतर सर्वांना धक्का बसला. पोलिसांनी तरुणाला अटक केली आहे. इस्लामाबाद येथील १९ वर्षीय तरुणीची शनिवारी सकाळी तिच्या भावाने गोळ्या घालून हत्या केली. रविवारी या तरुणीचे लग्न होते. लग्नाच्या आदल्या दिवशी बहिणीची भावाने हत्या केली. त्यानंतर त्याने स्वतःला पोलिसांच्या हवाली केले. चौकशीदरम्यान त्याने पोलिसांना धक्कादायक माहिती दिली. बहिणीचे तिच्या दोन मोठ्या बहिणीचा दीर कासिम याच्यासोबत प्रेमसंबंध होते. गेल्या चार वर्षांपासून त्यांचे प्रेमसंबंध होते. घरच्यांचा विरोध असूनही ते दोघे एकमेकांना भेटायचे. बहिणीचं लग्न ठरल्याचे समजताच, तो संतापला. कासिम याने त्याच्या मोबाइलवर बहिणीचे अश्लील फोटो पाठवले. ते फोटो पाहून राग अनावर झाला आणि त्याने बहिणीची हत्या केली, असे त्याने सांगितले. कासिमने बहिणीचे आयुष्य उद्ध्वस्त केलं असतं... पोलीस कोठडीत असलेल्या आरोपीच्या चेहऱ्यावर जरासुद्धा पश्चाताप दिसून येत नव्हता. त्याने सांगितले की, काही दिवसांपूर्वी बहीण आपला प्रियकर कासिमसोबत पळून गेली होती. तिची कशीबशी समजूत काढली आणि तिला परत आणले होते. या घटनेनंतर कुटुंबाची बदनामी झाली होती. त्यानंतर बहिणीचं लग्न ठरले होते. मात्र, कासिम ते लग्न मोडण्याचे प्रयत्न करत होता. तो वारंवार तिचे अश्लील फोटो मोबाइलवर पाठवत होता, असे त्याने सांगितले. लग्नानंतर कासिम त्याच्या बहिणीच्या पतीला हे फोटो पाठवेल, अशी भीती आरोपीला होती. त्यामुळे बहिणीचा संसार उद्ध्वस्त झाला असता. तसेच समाजात बदनामी झाली असती, असेही त्याला वाटत होते. त्यामुळे त्याने बहिणीची गोळ्या घालून हत्या केली. दरम्यान, आरोपीला अटक करून त्याची रवानगी कोठडीत करण्यात आली आहे.
